ამერიკის ღია პირველობის 2021 წლის ჩემპიონი დანიილ მედვედევი გახდა, რომელმაც კარიერაში პირველად მოიგო დიდი სლემის ტურნირი.

რუსმა ჩოგბურთელმა ფინალში ნოვაკ ჯოკოვიჩს პრაქტიკულად შანსი არ დაუტოვა და სამ სეტში 6:4, 6:4, 6:4 აჯობა. თამაში მხოლოდ 2 საათსა და 17 წუთს გაგრძელდა და მედვედევი შესანიშნავი იყო, რითაც ავსტრალიის ღია პირველობის ფინალში მარცხისთვის სრულფასოვანი რევანში აიღო.

ჯოკოვიჩს შანსი ჰქონდა როჯერ ფედერერისთვის და რაფა ნადალისთვის დიდი სლემების რაოდენობით გადაესწრო, მაგრამ ეს ამოცანა მომავლისთვის გადაედო. „ნოლეს“ მიმდინარე წელს ავსტრალიის ღია პირველობა, როლან გაროსი და უიმბლდონი ჰქონდა მოგებული და შეეძლო ერთ წელიწადში მეოთხე დიდი ტურნირიც მოეგო, რაც აქამდე მხოლოდ როდ ლეივერს აქვს გაკეთებული (ორჯერ, 1962 და 1969 წლებში), მაგრამ სერბმა ეს ვერ გააკეთა და ფინალში სეტიც ვერ მოიგო.

შეგახსენებთ, ქალთა შორის ამერიკის ღია პირველობაზე 18 წლის დიდმა ბრიტანელმა, ემა რადუკანუმ იჩემპიონა.

ნოვაკ ჯოკოვიჩი - დანიილ მედვედევი 0:3 (4:6, 4:6, 4:6)