ესპანეთში ახალი საკალათბურთო სეზონი გაიხსნა და სუპერთასის ნახევარფინალში გიორგი შერმადინის „ლენოვო ტენერიფე“ მადრიდის „რეალს“ დაუპირისპირდა. ქართველმა ცენტრმა შესანიშნავი თამაში ჩაატარა, მაგრამ მისი გუნდი დაძაბულ ბრძოლაში 70:72 დამარცხდა.

არადა, „ტენერიფემ“ კარგად დაიწყო და პრაქტიკულად მთელი მატჩი წინ იყო, მაგრამ ბოლოს სადავეები ხელიდან გაექცა და მარცხი განიცადა. გადამწყვეტი ბოლო პერიოდი იყო, რომელიც „რეალმა“ 24:17 მოიგო.

შერმადინმა 25:15 წუთში 21 ქულა, 3 მოხსნა და 1 დაფარება მიითვალა. გიორგიმ 8-დან 7 ორქულიანი და 9-დან 7 საჯარიმო ჩააგდო, მისი მარგი ქმედების კოეფიციენტი კი 21-ს გაუტოლდა, რაც ორივე გუნდში საუკეთესო მაჩვენებელი იყო.

აქვე გეტყვით, რომ მადრიდის „რეალი“ სუპერთასის ფინალში „ბარსელონას“ დაუპირისპირდება, რომელმაც „ვალენსიას“ 87:68 აჯობა.