ინგლისური „ლივერპულის“ მთავარმა მწვრთნელმა იურგენ კლოპმა მისი გუნდის პასიურ სატრანსფერო ბაზარზე კომენტარი გააკეთა. როგორც გერმანელმა განაცხადა, ვერ დახარჯავენ ფულს, რომელიც არ აქვთ, ხოლო კონკურენტების სატრანსფერო აქტიურობით გაკვირვებული არაა.

„ჩვენ არ შეგვიძლია სხვა კლუბებს შევედაროთ, რადგან მათ არ აქვთ საზღვრები ჩვენგან განსხვავებით. უფლება გვაქვს დავხარჯოთ ის ფული, რომელსაც გამოვიმუშავებთ და ეს არის ის, რასაც ყოველთვის ვაკეთებდით. ხალხი ფიქრობს, რომ თუ ფეხბურთელს არ ყიდულობ, არ მუშაობ, მაგრამ ასე არ არის. შესაძლოა ეს ზაფხული არ იყო ყველაზე ამაღელვებელი, მაგრამ თუ „ლივერპულის“ გულშემატკივარი ხარ, უნდა დაკმაყოფილდე უახლესი ამბებით (ალისონის, ვან დეიკისა და ფაბიონის კონტრაქტის განახლება - რედ). არასდროს მიკვირს „მანჩესტერ სიტის“, „ჩელსის“ ან „მანჩესტერ იუნაიტედის“ ფინანსური სიძლიერის, არ მიკვირს, რომ ისინი ფულს ხარჯავენ. დიდი ხანია აქ ვარ და ვიცი, რომ ისინი ამისთვის გზას პოულობენ. ჩვენ არ შეგვიძლია დავხარჯოთ ფული, რომელიც არ გვაქვს, შესაძლოა სხვებმა ეს შეძლონ“, - განაცხადა კლოპმა.

შეგახსენებთ, „ლივერპული“ პრემიერლიგის პირველ ტურში 14 აგვისტოს „ნორვიჩ სიტის“ ესტუმრება და მატჩი თბილისის დროით 20:30 საათზე დაიწყება.