იტალიური „მილანის“ მცველი მატია კალდარა კარიერას „ვენეციაში“ გააგრძელებს. 27 წლის ფეხბურთელი ახალ გუნდს ერთწლიანი იჯარით და გამოსყიდვის უფლებით შეუერთდა.

კალდარამ თავი ბერგამოს „ატალანტაში“ 2016-2018 წლებში გამოიჩინა, როდესაც 66 მატჩში 10 გოლი გაიტანა და „იუვენტუსში“ გადავიდა, თუმცა, ტურინელთა რიგები რამდენიმე კვირაში დატოვა, რადგან „მილანში“ გაასხვისეს და ლეონარდო ბონუჩიში გაცვალეს.

„როსონერიში“ მან ფეხი ვერ მოიკიდა, მხოლოდ 2 თამაში ჩაატარა და ბოლო ორი სეზონი იჯარით „ატალანტაში“ იყო, მაგრამ ძირითადში ვერც მშობლიურ გუნდში დაიბრუნა ადგილი. მას იტალიის ნაკრებში 2018 წელს ორჯერ უთამაშია, „ვენეცია“ კი ახალ სეზონს სერია A-ში გაატარებს.