თავისუფალ ჭიდაობაში ქართველმა ფალავნებმა ასპარეზობა დაასრულეს. 97 კგ წონით კატეგორიაში ელიზბარ ოდიკაძეს ბრინჯაოს მედლის შანსი ჰქონდა და რეპეშაჟში იასპარეზა, მაგრამ ნახევარფინალში აზერბაიჯანელ შარიფ შარიფოვთან დამარცხდა და ოლიმპიადა უმედლოდ დაასრულა.

ოდიკაძე 5:3-ს იგებდა, მაგრამ შეხვედრის დასრულებამდე 13 წამით ადრე ქულები გაუშვა და საბოლოოდ, 5:7 წააგო. აზერბაიჯანელი ბრინჯაოს მედლისთვის გავა ხალიჩაზე.

შეგახსენებთ, ოლიმპიური თამაშების პირველ შეხვედრაში ოდიკაძე ირანდელ მოჰამადჰოსეინს მოჰამადიანს დაუპირისპირდა და 6:3 აჯობა, რის შედეგადაც მომდევნო ეტაპზე გავიდა. აღსანიშნავია, რომ ელიზბარი შეხვედრის მიწურულამდე 0:3 მარცხდებოდა, მაგრამ მერე 6 ქულა აიღო და მოიგო. მეოთხედფინალში ელიზბარი წონის ლიდერს, რუს აბდულრაშიდ სადულაევს დაუპირისპირდა, რომელსაც წინააღმდეგობა ვერ გაუწია და მეტოქემ აშკარა უპირატესობით 10:0 მეორე პერიოდის დასაწყისში იმარჯვა.

საქართველოს თავისუფალ ჭიდაობაში 6 წონითი კატეგორიიდან მხოლოდ სამში ჰყავდა წარმომადგენელი და ერთი მედალი მოიპოვა - გენო პეტრიაშვილი ვერცხლის მედალს დაეუფლა და ოქრომდე 0.3 წამი დააკლდა. აქვე გეტყვით, რომ ბერძნულ-რომაულ ჭიდაობაში 4 ქართველი ფალავანი ასპარეზობდა და მაქსიმუმი ამ სახეობაშიც 1 ვერცხლის მედალი გამოდგა.