ლუის ჰამილტონმა და მისმა თანგუნდელმა ვალტერი ბოტასმა, უნგრეთის დიდი პრიზის რბოლის სტარტზე, პირველ რიგში დადგომის უფლება მოიპოვეს. ორივემ კი უკან მოიტოვა ჩემპიონატის ლიდრი მაქს ფერსტაპენი, ვინც თანაგუნდელ სერხიო პერესთან ერთად, მეორე რიგში დაიკავებს ადგილს.
ჰამილტონისთვის ეს კარიერაში მოპოვებული 101-ე პოულ პოზიციაა. და მას შანსი აქვს, მე-100 დიდი პრიზიც მოიგოს. თუ ეს შეძლო, ფორმულა 1-ის ისტორიაში, პირველი პილოტი გახდება, ვისაც ასი რბოლა აქვს მოგებული. თუმცა ფერსტაპენი იქადნის, რომ მეტოქეს ამის საშუალებას უნგრეთში არ მისცემს.
კვალიფიკაციის პირველ ორ ნაწილში, ფერსტაპენი ყველაზე სწრაფი იყო. პირველში მან ჰამილტონს აჯობა, მეორეში კი - ლანდო ნორისს. მაგრამ როდსაც ყველაზე მეტად იყო საჭირო, მან საუკეთესო წრე ვერ შეკრა. ჰოლანდიელმა განაცხადა, რომ საბურავების იმ კომპლექტმა, რომლითაც ბოლო ნაწილში იასპარეზა, კარგად ვერ იმუშავა.
ჰუნგარორინგზე კვალიფიკაციაში გამარჯვებას დიდი მნიშვნელობა აქვს, რადგან ამ ტრეკზე გასწრება ძალიან რთულია. რბოლის წინ, ფერსტაპენი ლიდერია და ჰამილტონს 8 ქულას უგებს. საინტერესოა ისიც, რომ მსოფლიოს შვიდგზის ჩემპიონს, ეს რბოლა რვაჯერ აქვს მოგებული. აქამდე ფერსტაპენის ანგარიშზე, 5 მოგებული რბოლაა, ჰამილტონისა კი - 4. კვალიფიკაციებშიც წინ ჰოლანდიელია - 5-3.
უნგრეთის დიდი პრიზი
კვალიფიკაცია
- ლუის ჰამილტონი (ბრიტანეთი, მერსედესი) 1'15.419
- ვალტერი ბოტასი (ფინეთი, მერსედესი) 0.315
- მაქს ფერსტაპენი (ჰოლანდია, რედ ბული) 0.421
- სერხიო პერესი (მექსიკა, რედ ბული) 1.002
- პიერ გასლი (საფრანგეთი, ალფატაური) 1.064
- ლანდო ნორისი (ბრიტანეთი, მაკლარენი) 1.070
- შარლ ლეკლერი (მონაკო, ფერარი) 1.077
- ესტებან ოკონი (საფრანგეთი, ალპინი) 1.234
- ფერნანდო ალონსო (ესპანეთი, ალპინი) 1.296
- სებასტიან ფეტელი (გერმანია, ასტონ მარტინი) 1.331
- დანიელ რიკარდო (ავსტრალია, მაკლარენი) 1.452
- ლანს სტროლი (კანადა, ასტონ მარტინი) 1.474
- კიმი რაიკონენი (ფინეთი, ალფა რომეო) 2.145
- ანტონიო ჯოვინაცი (იტალია, ალფა რომეო) 2.164
- კარლოს საინსი (ესპანეთი, ფერარი) ავარია
- იუკი ცუნოდა (იაპონია, ალფატაური) 2.500
- ჯორჯ რასელი (ბრიტანეთი, უილიამსი) 2.525
- ნიკოლას ლატიფი (კანადა, უილიამსი) 2.617
- ნიკიტა მაზეპინი (რუსეთი, ჰაასი) 3.503
- მიკ შუმახერი (გერმანია, ჰაასი) ავარია
