იტალიის ნაკრების მთავარმა მწვრთნელმა რობერტო მანჩინიმ ევრო 2020-ის ნახევარფინალში ესპანეთთან შეხვედრამდე პრესკონფერენცია გამართა. იტალიელი მწვრთნელი რთულ მატჩს ელოდება და ამბობს, რომ ესპანეთი ბოლო 20 წლის განმავლობაში მსოფლიოში დომინანტი ნაკრებია.

“დაძაბულობა? ეს ჩემშიც არის, რაც უფრო ახლოვდება თამაში. ცივი გონებით უნდა შევხვდეთ, რომ რაც შეიძლება ნაკლები შეცდომა დავუშვათ. შესანიშნავია ასეთ მატჩებში მონაწილეობა... როდესაც ყველას შორის კარგი ურთიერთობაა, გუნდი ძლიერია. ხვალ მაღალ დონეზე უნდა ვითამაშოთ, რათა ფინალში გავიდეთ.

რთული თამაში იქნება, მიუხედავად იმისა, რომ ესპანეთი ბელგიისგან განსხვავდება. უფრო მეტად რთული იქნება. ავსტრიასთან გაგვიჭირდა, რადგან პლეი-ოფის პირველი მატჩი იყო და ისინი ძალიან აგრესიულები იყვნენ. ესპანეთი ძალიან ძლიერი გუნდია, იმის მიუხედავად, რომ ამ გუნდში ბევრი ცვლილება მოხდა. მათ ძალიან კარგი მწვრთნელი და ფეხბურთელები ჰყავთ. ბოლო ოცი წელია ისინი მსოფლიო ფეხბურთში დომინირებენ და ახლა არ შეიცვლებიან. ორივე გუნდს თანაბარი შანსი აქვს. ლუის ენრიკემ „ბარსელონაში“ ჩემპიონთა ლიგა მოიგო, მაგრამ მხოლოდ ეს არ არის, „რომაშიც“ კარგად იმუშავა და თავისი უნარები დაამტკიცა.

ტიკი ტაკა ესპანური ფეხბურთია, რომელიც მათ გამოიგონეს, რამაც ისინი საოცარ წარმატებამდე მიიყვანა. ისინი ამის გაკეთებას წარმატებით განაგრძობენ. ჩვენ ოდნავ განსხვავებულები ვართ. იტალიელები ვართ და უცებ ესპანელები ვერ გავხდებით, ვეცდებით ჩვენი თამაში ვითამაშოთ.

იმობილე? მას ოქროს ბუცი აქვს მოგებული და ერთ-ერთია, ვინც ბოლო წლებში ყველაზე მეტი გოლი გაიტანა. მუნდიალზე ან ევროპის ჩემპიონატზე, ხშირად ისინი წყვეტენ მატჩის ბედს, ვისაც ყველაზე ხშირად აკრიტიკებენ.

წლებია ამბობენ, რომ ბონუჩი და კიელინი საუკეთესოები არიან, მაგრამ მათ სურთ ეს ყოველ ჯერზე დაამტკიცონ. თუ შეუძლია კიელინის ზედიზედ სამი მატჩის ჩატარება? იმედი მაქვს, რომ კი, თუ ასე არ იქნება, აქ არიან აჩერბი და ბასტონი, რომლებიც შესანიშნავ ფორმაში არიან“, - თქვა მანჩინიმ.

შეგახსენებთ, იტალია ესპანეთის ნაკრებს 6 ივლისს, დაუპირისპირდება. მატჩი თბილისის დროით 23:00 საათზე დაიწყება.