„ფერარის“ გუნდის შეფმა მატია ბინოტომ განაცხადა, რომ მიმდინარე სეზონისთვის, მანქანის მცირე განახლებები იგეგმება. გუნდის ინჟინრები კი ძირითადად მომავალი სეზონისთვის მზადებაზე არიან გადართულნი.
2022 წლის სეზონში ტექნიკური რეგლამენტი მნიშვნელოვნად იცვლება, რაც გუნდებისგან თადარიგის ადრეულად დაჭერას მოითხოვს. და ისინიც რესურსების დიდ ნაწილს, სწორედ ახალი მანქანის შექმნაზე მიმართავენ.
სიტუაციას ართულებს ბიუჯეტის ჭერი და შეზღუდვები აეროდინამიკაზე ჰანდიკაპირებულ მუშაობაში. ჰანდიკაპი გულისხმობს იმას, რომ კონსტრუქტორთა ჩემპიონატზე უკანა ადგილებზე გასულ გუნდებს, აეროდინამიკაზე მეტი მუშაობის უფლება ეძლევათ.
ემილია-რომანია დიდი პრიზის შემდეგ, ბინოტომ განაცხადა, რომ „ფერარი“ კმაყოფილია იმ პროგრესით, რაც გუნდს გასული სეზონის შემდეგ აქვს. ეს კი ხელმძღვანელობას იმის საშუალებას აძლევს რომ ყურადღება ახალი სეზონისთვის მზადებაზე გადაიტანოს. მარანელოელებმა გასული სეზონი მეექვსე ადგილზე დაასრულეს და შესაბამისად, ახალი სეზონისთვის მოსამზადებლად, მეტი დრო აქვთ, ვიდრე მათ წინ გასულ გუნდებს.
„ვფიქრობ, ამ სეზონის მანქანა ისეთია, როგორსაც ველოდით. ჩვენს გათვლებთან კარგი კორელაციაა. ეს კი შესანიშნავია. არის 2022 წლის სეზონისთვის მზადების დაწყების დრო? ჩვენ ეს უკვე იანვარში გავაკეთეთ. ასე რომ, გუნდი უკვე მომავალ სეზონზეა ფოკუსირებული. სიახლეები ამ სეზონშიც გვექნება, მაგრამ ეს ჩვენი პრიორიტეტი არაა“, - ამბობს ბინოტო.
