საქართველოს საკალათბურთო ნაკრების წევრმა გიორგი შარაბიძემ უნგრული “კიორმენდის” მაისურით მორიგი საკონტროლო მატჩები გამართა და ახალ გუნდს ორ შეხვედრაში 31 ქულა შესძინა.

თავდაპირველად, კიორმენდელებმა “შოპრონს” მოუგეს (82:77) და ქართველი ცენტრის მონაგარი 15 ქულა გახლდათ. შარაბიძე კიდევ უფრო უკეთ გაისარჯა “კაპოშვართან” წაგებულ (65:88) მატჩში.

გიორგიმ მოედანზე 24 წუთი გაატარა და 16 ქულა, 7 მოხსნა (5 მეტოქის ფარზე) და 5 ჩაჭრა მოაგროვა. ქართველმა კალათბურთელმა 12-დან 7 ორქულიანი და 3-დან 2 საჯარიმო ჩააგდო, სამქულიანი ააცილა, ბურთი 6-ჯერ დაკარგა, 3 პერსონალური ფოლი მიიღო, მის წინააღმდეგ კი 2-ჯერ დაჯარიმდნენ.

“კიორმენდს” უნგრეთის ჩემპიონატის პირველი მატჩი 11 ოქტომბერს ელის, როდესაც კეჩკემეტში “დუნა აშფალტს” ესტუმრება.