ზაგრების „დინამომ“ დაამტკიცა, რომ შეუძლებელი არაფერია! ხორვატული გუნდი ლონდონის „ტოტენჰემთან“ წილისყრის შედეგადაც კი განწირული ჩანდა, პირველმა თამაშმა კი საერთოდ თითქოს ყველანაირი ინტრიგა გააქრო, რადგან ჟოზე მოურინიოს გუნდმა შინ 2:0 მოიგო.

რა შანსი უნდა ჰქონოდა „დინამოს“ საპასუხო თამაშში? მაგრამ ბრძოლას ყოვლთვს აქვს აზრი! მისლავ ორშიჩს ისეთი საღამო ჰქონდა, შვილიშვილებს რომ მოუყვება. 28 წლის ხორვატმა თავდამსხმელმა ჰეთ-თრიქი შეასრულა და ზაგრებელთა ისტორიაში დაუვიწყარი ქამ-ბექის მთავარი შემოქმედი გახდა. „ტოტენჰემი“ 62-ე წუთამდე მშვიდად ახერხებდა სასურველი 0:0-ს შენარჩუნებას, მაგრამ შემდეგ ყველაფერი თავდაყირა დადგა. ორშიჩმა 62-ე და 83-ე წუთებზე შეძლო თავის გამოჩენა და ორი მატჩის ჯამში ყველაფერი გათანაბრდა. დაინიშნა დამატებითი დრო და ისევ ორშიჩი, რომელმაც 106-ე წუთზე უკვე მესამედ გაუტანა ლონდონურ გუნდს და ზაგრების „დინამომ“ 3:0 მოიგო! შედეგად, მეოთხედფინალში თავად ითამაშებს და არა „ტოტენჰემი“.

ესპანური „გრანადა“ ევროპა ლიგის დებიუტანტია, მაგრამ უკვე მეოთხედფინალშია. ესპანელებმა ნორვეგიულ „მიოლდესთან“ შინ 2:0 მოგების შემდეგ უპირატესობა შეინარჩუნეს. ნორვეგიელებმა ბოლომდე იბრძოლეს, მაგრამ ვეტერანი რობერტო სოლდადოს გოლმა ყველაფერი გადაწყვიტა. „გრანადამ“ 1:2 წააგო, მაგრამ ორი მატჩის ჯამში გამარჯვებული გამოვიდა - 3:2. ცნობისთვის, ესპანელებმა ევროპა ლიგის მეორე საკვალიფიკაციო ეტაპზე თბილისის „ლოკოტივის“ ბარიერი დაძლიეს (2:0).

ლონდონის „არსენალს“ პირეოსის „ოლიმპიაკოსთან“ სტუმრად 3:1 მოეგო და შინ ცოტა მოდუნებული ჩანდა. „მეთოფეებმა“ წააგეს (0:1), მაგრამ მთლიანობაში მომდევნო ეტაპზე ინგლისური კლუბი გავიდა (3:2).

ყველაზე მშვიდად მეოთხედფინალშია დღის პირველი სესიი მატჩებიდან იტალიური „რომა“ გავიდა. „ჯალოროსიმ“ დონეცკის „შახტარს“ ჯერ შინ მოუგო 3:0 და ახლა კიევში 2:1 აჯობა. დავით ხოჭოლავა თადარიგში დარჩა და არ უთამაშია.

„არსენალი“ – „ოლიმპიაკოსი“ 0:1 (0:0) - ორი მატჩის ჯამში 3:2

გოლი: 0:1 ელ არაბი (51)

„დინამო ზაგრები“ – „ტოტენჰემი“ 3:0 დ.დ (0:0) - 3:2

გოლები: 1:0 ორშიჩი (62), 2:0 ორშიჩი (83), 3:0 ორშიჩი (106)

„მიოლდე“ – „გრანადა“ 2:1 (1:0) - 2:3

გოლები: 1:0 ვალიეხო (29, ა.გ), 1:1 სოლდადო (72), 2:1 ჰესტადი (90, პენ)

„შახტარი“ – „რომა“ 1:2 (0:0) - 1:5

გოლები: 0:1 მაიორალი (48), 1:1 მორაეში (59), 1:2 მაიორალი (72)