საქართველოს წყალბურთელთა ნაკრებს როტერდამში მიმდინარე ოლიმპიადის სალიცენზიო ტურნირის მეორე ტურში თურქეთთან მოგება ჩაეთვალა. აღნიშნულ გუნდებს შორის დაპირისპირება 15 თებერვალს, თბილისის დროით 23:00 საათზე უნდა დაწყებულიყო, თუმცა მეტოქე გუნდში კორონავირუსის რამდენიმე შემთხვევა დაფიქსირდა და შეხვედრა გაუქმდა.

დეიან სტანოევიჩის გაწვრთნილმა გუნდმა ტურნირი საბერძნეთთან მატჩით დაიწყეს და დრამატულ ბრძოლაში 1-ქულიანი სხვაობით 10:11 წააგეს, ხოლო მომდევნო შეხვედრას დღეს, კანადის წინააღმდეგ ცაატარებენ. მატჩი თბილისის დროით 19:00 საათზე დაიწყება.

შეგახსენებთ, რომ ოლიმპიადის საკვალიფიკაციო ტურნირი 14 თებერვლიდან 21 თებერვლის ჩათვლით როტერდამში ჩატარდება. საქართველოს ნაკრებმა კი აღნიშნულ შეჯიბრში ასპარეზობის უფლება ისტორიაში პირველად, ევროპის ჩემპიონატზე დაკავებული მე-10 ადგილის წყალობით მოახერხა. ჩვენი გუნდი A ჯგუფში: ბრაზილიასთან, კანადასთან, საბერძნეთთან, მონტენეგროსთან და თურქეთთან ერთად იმყოფება. ამ ექვსი გუნდიდან კი პლეი-ოფში 4 საუკეთესო გავა, რომლებიც ოლიმპიადის საგზურისთვის ბრძოლას გააგრძელებს.