ესპანეთის ლიგა ენდესას მე-19 ტურში „იბეროსტარ ტენერიფემ“ მეტად დასანანი მარცხი განიცადა. გიორგი შერმადინის გუნდი ბოლოადგილოსან „გიპუზკოას“ სან სებასტიანში ესტუმრა და გამარჯვებასთან ძალიან ახლოს იყო.

„ტენერიფე“ უპირატესობას ფლობდა, მაგრამ ბოლოსკენ მოდუნდა და ყველაფერი დრამატულად წარიმართა. საფინალო სირენამდე 2 წამით ადრე, როდესაც კანარიელები 85:86-ს აგებდნენ, შერმადინმა ორქულიანი ჩააგდო და თითქოს თავის გუნდს მოაგებინა. თუმცა, ეს 2 წამი საკმარისი გამოდგა „გიპუზკოას“ კალათბურთელ მაიკ კარლსონისთვის, რომელმაც „შერმინატორის“ 2-ქულიანს სამქულიანით უპასუხა და ბურთი კალათში საფინალო სირენის ხმასთან ერთად ჩავარდა - 89:87 „გიპუზკოას“ სასარგებლოდ.

შერმადინს მარცხში არანაირი ბრალი არ მიუძღვის, მეტიც, რომ არა კარლსონი, უდაოდ მატჩის გმირი იქნებოდა. ქართველმა ცენტრმა 31:08 წუთში 28 ქულა, 6 მოხსნა და 4 პასი მიითვალა. შერმადინმა 15-დან 13 ორქულიანი და 3-დან 2 საჯარიმო ჩააგდო, მისი მარგი ქმედების კოეფიციენტი 33 აღმოჩნდა. ქულებითა და მარგი ქმედების მაჩვენებლით ის საუკეთესო იყო.

„იბეროსტარ ტენერიფემ“ ლიგა ენდესაში ზედიზედ მეორე თამაში წააგო. შედეგად, კანარიელები 14 მოგებითა და 4 წაგებით მესამე ადგილს იკავებენ, ხოლო მომდევნო შეხვედრას 16 იანვარს, ბექა ბურჯანაძის „გრან კანარიას“ წინააღმდეგ სტუმრად გამართავენ.