"მანჩესტერ სიტის" მთავარმა მწვრთნელმა პეპ გვარდიოლამ "ვესტ ბრომვიჩთან" ფრედ (1:1) დასრულებული პრემიერლიგის მატჩის შემდეგ განაცხადა, რომ თუ გუნდს პრემიერლიგაში ლიდერობა სურს, შედეგზე უნდა იყოს ორიენტირებული და თამაშში დომინანტობა არაფერს ნიშნავს.

"გრძელი სეზონი იქნება, მაგრამ ცხრილის სათავეში ყოფნა თუ გინდა ასეთი მატჩები უნდა მოიგო და ასეთი შედეგი არ უნდა დაგვეფიქსირებინა. შანსები შევქმენით, მატჩს ვაკონტროლებდით, მაგრამ უნდა მოიგო. ფეხბურთი შედეგზეა ორიენტირებული." - ციტირებს ესპანელის სიტყვებს BBC-ი.

"ვესტ ბრომვიჩთან" შეხვედრაში "ქალაქელებს" ბურთის ფლობა 77 პროცენტი ჰქონდა. კარის მიმართულებით მანჩესტერელებმა 26-ჯერ დაარტყეს და აქედან კარში ბურთი შვიდჯერ წავიდა. მეტოქის მეკარემ ბურთი ექვსჯერ მოიგერია. საბოლოოდ გვარდიოლას გუნდი ფრეს დასჯერდა და ცხრილის ლიდერებს "ტოტენჰემსა" და "ლივერპულს" ხუთი ქულით ჩამორჩება.