ამერიკის ღია პირველობა დომინიკ ტიმის ტრიუმფით დასრულდა. ავსტრიელმა ფინალში ალექსანდრ ზვერევი დაამარცხა ძალზე დრამატულ შეხვედრაში, რომელიც 4 საათსა და 5 წუთს გაგრძელდა - 3:2.

შეხვედრა ზვერევის კარნახით დაიწყო. რეიტინგის მეშვიდე ჩოგანი მატჩის მიმდინარეობას აკონტროლებდა და საწყისი ორი სეტი 6:2, 6:4 მოიგო. შედეგად, გერმანელმა ჩემპიონობისკენ უდიდესი ნაბიჯი გადადგა.

თუმცა, შემდეგ თამაშის ჩარხი აბსოლუტურად შეიცვალა და ტიმმა არანორმალური მობილიზება და ხასიათის სიმტკიცე აჩვენა. ATP-ს მესამე ნომერმა და ტურნირზე მეორე ნომრად განთესილმა დომინიკმა სეტებში ანგარიში მას შემდეგ გაათანაბრა, რაც მესამე-მეოთხე სეტში 6:4, 6:3 იმარჯვა.

ყველაფერი მეხუთე, გადამწყვეტ სეტზე იყო დამოკიდებული, რომელიც როგორც ფინალის შეეფერება, ისეთი გამოდგა. ყველაფერი ტაიბრეიკზე გადაწყდა, სადაც გათამაშება ავსტრიელმა 8:6 მოიგო და საბოლოოდ შეხვედრა 2:6, 4:6, 6:4, 6:3, 7:6 - გამარჯვებით დაასრულა.

დომინიკ ტიმი US Open-ის პირველი ჩემპიონია 1949 წლის შედმეგ, რომელმაც ფინალში საწყისი ორი სეტის წაგების მიუხედავად, გამარჯვება მოახერხა. ბოლოს მსგავსი რამ ზუსტად 71 წლის წინ პანჩო გონსალესს ჰქონდა გაკეთებული. გარდა ამისა, გასტონ გაუდიოს შემდეგ (2004 წელი, როლან გაროსი) პირველი ჩოგბურთელია, რომელმაც დიდი სლემის ფინალი საწყისი ორი სეტის წაგების მიუხედავად მოიგო.

ტიმი პირველი ავსტრიელი ჩოგბურთელი გახდა 1995 წლის (ტომას მუსტერი) შემდეგ, რომელმაც დიდი სლემი მოიგო. კიდევ ორი საინტერესო ფაქტი - დომინიკი 2014 წლის შემდეგ, როდესაც აშშ-ს ჩემპიონატი მარინ ჩილიჩმა მოიგო, პირველი ახალი ჩემპიონია ამ ტურნირზე და 2009 წლის შემდეგ (ხუან მარტინ დელ პოტრო) დიდი სლემის ყველაზე ახალგაზრდა (27 წლის) ჩემპიონი გახდა. ერთიც, დომინიკ ტიმი პირველი ჩოგბურთელია, რომელიც 90-იან წლებში დაიბადა და დიდი სლემის ტურნირი მოიგო...

ალექსანდრ ზვერევი - დომინიკ ტიმი 2:3 (6:2, 6:4, 4:6, 3:6, 6:7)