კატალონიის „ბარსელონას“ რონალდ კუმანი გაწვრთნის. ნიდერლანდელმა სპეციალისტმა გუნდი 2022 წლის 30 ივნისამდე ჩაიბარა. ინფორმაცია „ბლაუგრანას“ ვებგვერდმა ოფიციალურად დაადასტურა.

57 წლის მწვრთნელმა კიკე სეტიენი შეცვალა, რომელიც „ბარსელონადან“ ჩემპიონთა ლიგაზე მეოთხედფინალურ შეხვედრაში „ბაიერნთან (2:8) მარცხის შემდგომ გაათავისუფლეს.

შეგახსენებთ, რომ რონალდ კუმანი „ბარსელონაში“ 1989-1995 წლებში თამაშობდა, სადაც 264 შეხვედრა ჩაატარა და 88 გოლის გატანა მოახერხა. 1998-2000 წლებში კი ის „ბლაუგრანას“ სამწვრთნელო შტაბში იყო დასაქმებული. ბოლოს კი ნიდერლანდების ნაკრების მთავარი მწვრთნელის პოსტზე მუშაობდა.

აღსანიშნავია ისიც, რომ კატალონელებმა ისტორიაში პირველად ჩემპიონთა თასი სწორედ კუმანის გოლით მოიგეს.