კრიშტიანუ რონალდუ „იუვენტუსის“ დატოვებას არ აპირებს და არც გუნდს აქვს მისი გაყიდვის იდეა. ინფორმაციას ესპანური As-ი ფეხბურთელის ახლო გარემოცვაზე დაყრდნობით ავრცელებს.

დღეს, კრიშტიანუს, ლიონელ მესისა და პეპ გვარდიოლას ავტობიოგრაფიული წიგნის ავტორმა გუილემ ბალაგემ BBC-ის რადიოსთან თქვა, რომ „იუვე“ პორტუგალიელს ყველა გრანდს სთავაზობდა და მათ შორის „ბარსელონასაც“. მიზეზი ფეხბურთელის ასტრონომიული ხელფასია (წელიწადში 30 მილიონი ევრო).

თუმცა, ბოლო ცნობებით, ეს ინფორმაცია არ დადასტურდა და როგორც ფეხბურთელის გარემოცვა იტყობინება, რონალდუ ტურინში მინიმუმ კონტრაქტის ბოლომდე (2022 წელი) დარჩება, თუ არა კიდევ უფრო მეტ ხანს.

შეგახსენებთ, კრიშტიანუ „იუვენტუსს“ 2018 წელს მადრიდის "რეალიდან" 105 მილიონ ევროდ შეუერთდა და 89 მატჩში 65 გოლის გატანა მოახერხა.