ათენის „პანათინაიკოსი“ "რასინგის" ქართველი თავდამსხმელით, გიორგი პაპუნაშვილით ისევ დაინტერესებულია. ბერძნული გუნდი ჩვენებურის დამატებას ჯერ კიდევ იანვარში ცდილობდა, მაგრამ მაშინ ტრანსფერი არ შედგა.

ამის მიუხედავად, ათენელთა სპორტული დირექტორი ხავი როკა კვლავ მიუბრუნდა პაპუნაშვილს და ამჯერად იმედოვნებს, რომ ზაფხულში კლუბში მის მიყვანას შეძლებს.

„პაპუნაშვილი აკმაყოფილებს გუნდის სპეციფიკას, ცაციაა, ძლიერია ერთ-ერთზე თამაშის დროს, საქართველოს ნაკრების წევრია და „პანათინაიკოსის“ ბიუჯეტსაც შეეფერება. როგორც ჩვენთვისაა ცნობილი, როკა ქართველის მენეჯერსაც დაუკავშირდა, რომელიც ფეხბურთელს კვიპროსულ, რუსულ და რუმინულ ვარიანტებსაც სთავაზობს, მაგრამ სახელის გამო უპირატესობა „პანათინაიკოსს“ ანიჭებს. პაპუნაშვილი „სარაგოსას“ საკუთრებაშია, თუმცა გუნდს მისი გაყიდვა მოუწევს, რადგან კორონავირუსის ეკონომიკურ ვითარებაში ხელფასის გადახდა გაუჭირდება“, - წერს ბერძნული გამოცემა In.gr-ი.

შეგახსენებთ, პაპუნაშვილი „სარაგოსაში“ 2017 წლიდან თამაშობდა და 58 მატჩში 13 გოლი გაიტანა, ხოლო იანვარში არაგონელებმა სანტანდერის „რასინგში“ გაანათხოვრეს, სადაც ჩვენებურმა მხოლოდ 4 უგოლო თამაშის ჩატარება მოასწრო.

„პანათინაიკოსს“ რაც შეეხება, სეზონის შეწყვეტამდე საბერძნეთის ჩემპიონატში 44 ქულით მეოთხე ადგილს იკავებდა. ცნობისთვის, ქართველ ფეხბურთელს "სარაგოსასთან" კონტრაქტი 2022 წლის ზაფხულში ეწურება.