იტალიური „მილანის“ ლეგენდარულმა კაპიტანმა პაოლო მალდინიმ განაცხადა, რომ ყველაზე მეტად „ლივერპულთან“ 2005 წელს წაგებული ჩემპიონთა ლიგის ფინალი ახსოვს.

ეს იმის მიუხედავად, რომ მალდინიმ ხუთჯერ მოიგო ჩემპიონთა ლიგა/თასი, ფინალში კი ჯამში რვაჯერ ითამაშა:

„ფეხბურთი არაპროგნოზირებადია, მიზანმიმართულად არაფერი ხდება და სწორედ ესაა ამ სპორტის სილამაზე. ყველზე მეტად იმაზე მეღიმება, რომ ჩემპიონთა ლიგის 8 ფინალი ვითამაშე, ხუთი მოგივე, მაგრამ ყველაზე მეტად სტამბოლის წაგებული ფინალი მახსოვს „ლივერპულთან“. უდავოდ დიდი კვალი დატოვა. ფავორიტები ვიყავით, უკეთ ვთამაშობდით, მთელ თამაშს ვაკონტროლებდით, ყოველთვის სახიფათოდ ვუტევდით... როდესაც მარცხს შეეგუები, მერე უფრო ადვილია ახალი შანსის მიღება“, - თქვა მალდინიმ.

შეგახსენებთ, რომ 2005 წელს, სტამბოლში „მილანი“ „ლივერპულს“ 3:0-ს ამარცხებდა, მაგრამ ინგლისელებმა ანგარიში გაათანაბრეს, შემდეგ კი, პენალტების სერიაში იმარჯვეს. ამ შეხვედრაში პირველი გოლი, პირველივე წუთზე სწორედ მალდინიმ გაიტანა.