კატალონიის „ბარსელონას“ მთავარმა მწვრთნელმა ერნესტო ვალვერდემ არ იცის როდის დაუბრუნდება მოედანს ლიონელ მესი. ესპანელი სპეციალისტის განცხადებით, დაზიანება სერიოზული არაა, მაგრამ დაკვირვება სჭირდება.
„როგორ არის ლეო? არ ვიცი, არც ის ვიცი, რამდენი ხანი ვერ დაგვეხმარება. ვიმედოვნებთ, რომ მალე დაგვიბრუნდება. ეს არ არის სერიოზული ტრავმა, მცირე დაზიანებაა. ვნახოთ როგორ ივარჯიშებს დღეს და რა მოხდება შემდეგ კვირაში.
მასთან ერთად დიდი ძალა გვაქვს, თუ არ დავკარგავთ, სრულიად გადამწყვეტი მოთამაშეა ჩვენთვის. მისი არყოფნა არის პრობლემა, რომელსაც უნდა შევეგუოთ და წინ გავიხედოთ“, - თქვა ვალვერდემ.
შეგახსენებთ, რომ მესის სეზონის სტარტი ტრავმის გამო გაუცდა. პირველად ძირითად შემადგენლობაში სამშაბათს, „ვილიარეალთან“ გამოჩნდა, მაგრამ პირველივე ტაიმში დაშავდა და შესვენებაზე შეცვალეს.
