ფინეთის ქალაქ ვანტააში ევროპის ახალგაზრდული ჩემპიონატი ძიუდოში ჩინებულად მიმდინარეობს საქართველოს დელეგაციისთვის. დღეს 90 კგ წონით კატეგორიაში ჩვენი ქვეყნის მონაგარს ორი და მათ შორის ერთი უმაღლესი სინჯის, ოქროს მედალი შეემატა.

ლაშა ბექაურმა დაუმარცხებლად იასპარეზა და საქართველოს მიმდინარე ჩემპიონატზე მეოთხე ოქროს მედალი მოუტანა. ლაშა პირველი წრიდან თავისუფალი იყო, ხოლო შეჯიბრება ესტონელ სიმონ სულასთან გამარჯვებით დაიწყო, რასაც გერმანელი ლუის მაის ძლევაც მოჰყვა და ნახევარფინალში გავიდა. აქ ბექაურს B ჯგუფის გამარჯვებული რუსი მანსურ ლორსანოვი ელოდა და ჩვენებურმა ჩინებულად იასპარეზა, მეტოქე დაამარცხა და ფინალში აღმოჩნდა, სადაც არც უნგრელ როლანდ გოზს დაუთმო არაფერი და ახალგაზრდული ევროპის ჩემპიონის ტიტული მოიგო.

ამავე წონით კატეგორიაში ბრინჯაოს მედალი დაისაკუთრა მიხეილ ბექაურმა, რომელმაც D ჯგუფის საწყისი ორი მატჩი ხორვატ იოსიპ ბულიჩსა და თურქ მერთ სისმანლარს მოუგო, მაგრამ ნახევარფინალში გასასვლელი შეხვედრა მომავალ ფინალისტ უნგრელ როლანდ გოზთან (რომელსაც ლაშა ბექაურმა ფინალში მოუგო) დათმო. მიუხედავად ამისა, მიხეილი უმედლოდ არ დარჩენილა და რეპეშაჟში ჯერ იტალიელ ჯენარო პირელის აჯობა, ხოლო ბრინჯაოს მედლისთვის ბრძოლა აწ ნახსენებ რუს მანსურ ლორსანოვთან მოიგო.

შედეგად, საქართველოს ასპარეზობის მესამე დღეს 4 ოქროს (გიორგი თუთაშვილი, ეთერ ლიპარტელიანი, ტატო გრიგალაშვილი, ლაშა ბექაური), 1 ვერცხლის (ვლადიმერ ახალკაცი) და 2 ბრინჯაოს (მარიამ ჭანტურია, მიხეილ ბექაური) მედალი აქვს მოპოვებული.