იაპონიის დედაქალაქ ტოკიოში მიმდინარე 2019 წლის მსოფლიოს ჩემპიონატის მე-3 დღეს მოსალოდნელი დასასრული ჰქონდა. კვარცხლბეკის უმაღლეს საფეხურზე ავიდა იაპონიის ძიუდოისტთა ნაკრების ერთ-ერთი უმთავრესი ვარსკვლავი შოჰეი ონო (73 კგ.), რომელმაც მსოფლიო პირველობის ოქრო მესამედ დაისაკუთრა, ამას გარდა კი, მოქმედი ოლიმპიური ჩემპიონიც გახლავთ.

ონომ შინაურ კედლებში 6 ორთაბრძოლა ჩაატარა და ყველა მათგანი ვადაზე ადრე, იპონით დაასრულა. შეგახსენებთ, რომ 27 წლის ძიუდოისტმა მერვედფინალში 2012 წლის ოლიმპიური ჩემპიონი ქართველი ლაშა შავდათუაშვილი დაამარცხა, ფინალში კი ოლიმპიადისა და მსოფლიოს ჩემპიონატის ვერცხლის პრიზიორ რუსტამ ორუჯოვს (აზერბაიჯანი) საქმე წუთსა და 17 წამში მოუთავა. ამ წონაში ბრინჯაოს მედლები რუსმა დენის იარცევმა და კიდევ ერთმა აზერბაიჯანელმა ჰიდაიატ ჰეიდაროვმა დაისაკუთრეს.

დღესვე მედლები ქალთა 57 კგ-მდე წონით კატეგორიაში გათამაშდა, სადაც კანადის სახელით მოასპარეზე კრისტა დეგუჩიმ ფინალის დამატებით დროში გადამწყვეტი ვაზარი აართვა "ნამდვილ" იაპონელ ცუკასა იოშიდას, ბრინჯაოს პრიზიორები კი პოლონელი იულია კოვალჩიკი და ბრაზილიელი ოლიმპიური ჩემპიონი რაფაელა სილვა გახდნენ.

ხვალ, ქალები ჩემპიონს 63 კგ-ში გამოავლენენ, ვაჟები კი - 81-ში და ტატამზე საქართველოს ნაკრების წევრ ლუკა მაისურაძესაც ვიხილავთ, რომელიც საწყის რაუნდში სამოელ პენიამინა პერსივალს გაეჯიბრება, წარმატების შემთხვევაში კი, თურქ ვედატ ალბაირაკთან იგივე ვანო რევაზიშვილთან (მოგვიანებით, ბერძენი რომან მუსტოპულოსი) ჭიდილი ელის.