ქართველი მოჭადრაკე ბაადურ ჯობავა (2584) ერთპიროვნულად გალიდერდა არაბეთის გაერთიანებული ემირატების დედაქალაქ აბუ დაბიში მიმდინარე საერთაშორისო ფესტივალზე, სადაც მას მხოლოდ 26-ე განთესვა აქვს, თუმცა კი, ოთხივე გასული პარტია მოიგო და პირველ ადგილზე იმყოფება.

მე-4 ტურში ბაადურმა თეთრი ფიგურებით სერბი ალეკსანდარ ინჯიჩი (2617) დაამარცხა და 7 მოჭადრაკისგან შემდგარ ჯგუფს 0.5 ქულით გაუსწრო. მე-5 ტურში, რომელიც დღეს შედგება, ჯობავა შავებით ერთ-ერთ მდევარს, ემირატების წარმომადგენელ სალეჰ სალემს (2668) გაეჯიბრება.
შეგახსენებთ, რომ აბუ დაბიში კიდევ ერთი ქართველი მოჭადრაკე ლუკა პაიჭაძე (2570) ირჯება, რომელიც გასულ ტურში თეთრი ფიგურებით ინდოელ ჩიტამბარამ არავინდს (2607) დაუზავდა და 3.0 ქულით მეცხრე-ოცდამეთორმეტე პოზიციებს ინაწილებს, დამატებითი მაჩვენებლებით კი, ოცდამესამეა. დღეს, ლუკა შავებით ხსენებულ ინჯიჩს დაუპირისპირდება.
აბუ დაბის საჭადრაკო ფესტივალი 9 ტურად მიმდინარეობს და 10 აგვისტოს დასრულდება, მისი საპრიზო ფონდი კი ასე განაწილდება: I ადგილი – 13 000 დოლარი, II – 7 500, III – 5 500, IV – 3 500, V – 2 000, VI – 1 500, VII – 1 000, VIII – 800, IX – 700, X – 600.