ქართველმა ჩოგბურთელმა სოფო შაფათავამ გერმანულ ბად საულგაუში მიმდინარე საერთაშორისო ტურნირზე (საპრიზო ფონდი 25 ათასი დოლარი) პირველი მატჩი ჩაატარა და წარუმატებლობა შეემთხვა.

შაფათავა ერთეულთა შეჯიბრის საწყის რაუნდში მე-3 ნომრად განთესილ კვიპროსელ რალუკა ჯეორჯინა სერბანს გაეჯიბრა და 3:6, 6:7 (2:7) დამარცხდა.
წყვილთა თანრიგის მეოთხედფინალში სოფო და უზბეკი ალბინა ხაბიბულინა მაკედონიურ-ხორვატულ დუეტს (ლინა გორჩესკა-ტენა ლუკასი) გაეჯიბრებიან.
ამერიკულ ფორტ ვორსში მიმდინარე 25-ათასიანი ტურნირის ძირითად ბადეში გასვლა მოახერხა სალომე დევიძემ. ქართველი ჩოგბურთელი კვალიფიკაციაში პირველ ნომრად იყო განთესილი და მასპინძლებთან 2 გამარჯვება იზეიმა.
სალომემ რეიჩელ იანსენი 6:2, 6:1 დაამარცხა, ალექსის კებერლეს კი 6:2, 6:7 (4:7), 10:8 სძლია. თუ ვინ იქნება დევიძის მეტოქე ძირითად ბადეში, მოგვიანებით გაირკვევა.