ზაგრების „დინამოს“ მთავარმა მწვრთნელმა ნენად ბიელიცამ ხორვატიის ჩემპიონატის პირველ ტურში ზაგრების „ლოკომოტივის“ (3:0) დამარცხების შემდეგ კომენტარი გააკეთა.

ხორვატ სპეციალისტს ბუნებრივია საუბარი თბილისის „საბურთალოსთან“ მოახლოებულ შეხვედრაზეც მოუწია. ბიელიცას განცხადებით, თბილისში მის გუნდს რამდენიმე ფეხბურთელი ვერ დაეხმარება. მათ შორის, ესპანელი ლიდერი დანი ოლმო.

„ახლა დანამდვილებით რაც ვიცი, ის გახლავთ, რომ კევინ თეოფილე, დანიელ ზაგორაკი, სადეგ მოჰარემი და ემირ დილავერი თბილისში არ იქნებიან. გარდა ამისა, დანი ოლმო და ფრანსუა მუბანჯეც ვერ დაგვეხმარებიან, რადგან მათ ჯერ გუნდთან ერთად სრულყოფილად არ უვარჯიშიათ, ამიტომ მზადებას გააგრძელებენ და საპასუხო შეხვედრაში ალბათ ითამაშებენ.

ჩვენ ნაბიჯ-ნაბიჯ ვფიქრობთ. აქამდე „ლოკომოტივთან“ მატჩზე ვმუშაობდით, ახლა კი უკვე „საბურთალოზე“ ფიქრიც შეგვიძლია, ანალიზი უკვე გავაკეთეთ. დიახ, „შერიფის“ თავკაც ზორან ზეკიჩს ვესაუბრე და ყველა საჭირო ინფორმაცია მომაწოდა. ჩვენ აუცილებლად გამოვიყენებთ ყველა ინფორმაციას, რაც მისგან მივიღეთ“, - აღნიშნა ბიელიცამ.

შეგახსენებთ, „საბურთალოსა“ და „დინამოს“ პირველი შეხვედრა 23 ივლისს, თბილისში, 21:30 საათზე გაიმართება, ხოლო საპასუხო ერთი კვირის თავზე ზაგრებში.