ფეხბურთის გურმანები იმედგაცრუებულნი დარჩნენ. ყოველშემთხვევაში ნეიტრალური ქომაგები და ის ადამიანები, რომელთაც ჩემპიონთა ლიგის ფინალში ფავორიტი გუნდი არ ჰყავდათ.

ბევრმა თქვა, რომ ასეთი ცუდი (ხარისხობრივად) ჩემპიონთა ლიგის ფინალი საერთოდ არ უნახავთ. ალბათ, ეს გემოვნების საკითხია, მაგრამ „ლივერპული“ – „ტოტენჰემის“ შეხვედრა სანახაობრივი თვალსაზრისით კრიტიკას რომ ვერ უძლებდა, ეს სადაო საკითხი არაა.

გულშემატკივრებმა კი ნახევარფინალები გაიხსენეს და „ბარსელონა“ – „აიაქსი“ არშემდგარ ფინალს მისტირიან. აი, რამდენიმე კომენტარიც ტვიტერიდან:

„ბარსა“ და „აიაქსი“ ამისთვის მოკვდნენ?

„ბარსელონამ“ და „აიაქსმა“ დღევანდელისთვის ბოდიში უნდა მოგვიხადონ.

ძვირფასო „ბარსელონა“ და „აიაქსო“, შეგიძლიათ მეორე ტაიმში მოედანზე გამოხვიდეთ?

არის შანსი „ბარსელონა“ და „აიაქსი“ ფინალში ვიხილოთ?

შეგახსენებთ: შეიძლებოდა ფინალი „ბარსელონა“ – „აიაქსი“ ყოფილიყო.

იცით რა იქნებოდა დიდი ფინალი? „აიაქსი“ – „ბარსელონა“.

„აიაქსი“ – „ბარსელონა“ 3:3, ამჟამად პარალელურ სამყაროში მიმდინარეობს.

წარმოიდგინეთ რამდენად ლამაზი ფინალი იქნებოდა „აიაქსი“ „სპურსთან“ რომ არ დამარცხებულიყო.

არ შემიძლია დავიჯერო, რომ „ბარსა“ – „აიაქსის“ ფინალი ამ საშინელებისთვის მოგვპარეს“, - წერენ ქომაგები სოციალურ ქსელში.

შეგახსენებთ, „ბარსელონამ“ ნახევარფინალის პირველი მატჩი სახლში „ლივერპულთან“ 3:0 მოიგო, მაგრამ სტუმრად 0:4 წააგო. „აიაქსმა“ კი „ტოტენჰემს“ ჯერ ლონდონში 1:0 აჯობა, მერე შინ 2:0 იგებდა, მაგრამ საბოლოოდ 2:3 დამარცხდა და ასეთი დაუჯერებელი სცენარით მივიღეთ ინგლისური ფინალი, რომელშიც "ლივერპულმა" "ტოტენჰემი" 2:0 დაამარცხა, თამაში კი მართლაც უღიმღამო და ჩემპიონთა ლიგის ფინალისთვის არადამახასიათებელი გახლდათ.