კოპა ლივერტადორესის თასის მექვსე ტურის A ჯგუფის მატჩში პერუს „ალიანსა ლიმამ“ ჩილეს წარმომადგენელ „პალესტინოს“ უმასპინძლა და 1:2 წააგო. ამ შეხვედრაში ანგარიში მეტად კურიოზული და უცნაური გოლით გაიხსნა.

მე-18 წუთზე „ალიანსა ლიმას“ ნახევარმცველმა ტომას კოსტამ შორიდან სცადა გატანა და „პალესტინოს“ მეკარემ იგნასიო გონსალესმა ბურთი მოიგერია, თუმცა, ამის შემდეგ ძალიან უცნაურად გაისარჯა. ჩილელი კიპერი ვითარებაში აშკარად ვერ გაერკვა, იფიქრა, რომ მის კარს საფრთხე არ ემუქრებოდა, მაგრამ რეალურად გოლი გაუშვა.

ამის მიუხედავად, „პალესტინომ“ ტარიფენო არანდას დუბლით 2:1 მოიგო და ჯგუფური ეტაპი მესამე ადგილზე დაასრულა, რისი წყალობითაც სამხრეთ ამერიკის თასის გათამაშებაში ასპარეზობის უფლება (ევროპა ლიგის ანალოგი) მოიპოვა.

აქვე გეტყვით, რომ ხსენებული ჯგუფიდან პლეი-ოფში ბრაზილიური „ინტერნასიონალი“ და არგენტინული „რივერ პლეიტი“ გავიდნენ.