საქართველოს კრისტალბეთ ეროვნული ლიგის მე-7 ტური „ვიტ ჯორჯიასა“ და „საბურთალოს“ შეხვედრით დასრულდა და მოქმედმა ჩემპიონმა მდევრებთან უპირატესობა ამ ტურის შემდგომაც შეინარჩუნა.

„საბურთალო“ მეტოქეებზე ერთი თავით მაღლა დგას. ეს განვლილმა ტურებმა დაადასტურა და „დინამოსთან“ მატჩს თუ არ ჩავთვლით, ყოველთვის დამაჯერებელი იყო. ახლაც, გიორგი ჭიაბრიშვილის გუნდმა ამრტივად მოიგო. ამ გამარჯვებას კი მთავარი შემოქმედი ჰყავდა - გიორგი კოხრეიძე.

ნიჭიერმა ქართველმა შემტევმა გოლი გაიტანა და ორი საგოლე პასიც მიითვალა. კოხრეიძემ ჯერ ეფექტური დარტყმით მოახერხა გატანა. მთლად „მაკრატელას“ ვერ დავარქმევთ, მაგრამ ძალიან მაგარი გოლი გამოვიდა და ანგარიში გაიხსნა.

მეორე ნახევარში გიორგიმ საგოლე პასები დაარიგა. 72-ე წუთზე „ვიტ ჯორჯია“ ძალიან ახლოს იყო გოლთან, მაგრამ „საბურთალოს“ მცველმა ბურთი კარის ხაზიდან გამოიტანა და კონტრშეტევა დაიწყო, რომელიც გოლით დასრულდა. უბრალოდ ფანტასტიკურად გაისარჯა, რომელმაც ბურთი საკუთარ ნახევარზე მოიხელთა, სოლო რეიდი კი დიდებულად წარმართა. გზას ორი ფეხბურთელი გააბითურა და მერე ლაშა შინდაგორიძეს, დროული, უზუსტესი პასი გაუკეთა. თანაგუნდელის დიდებული გარჯა დააფასა და სხვაობა გაიზარდა.

მალევე, კოხრეიძემ მეორედ მიითვალა ასისტი. ამჯერზე თავით და ლევან კაკუბავამ ახლო მანძილიდან საბოლოო ანგარიში დააფიქსირა - 0:3.

„საბურთალოს“ 18 ქულა აქვს და სამეულს, „დინამო თბილისი“, „ტორპედო“, „დინამო ბათუმი“ 5 ქულით უსწრებს. „ვიტ ჯორჯია“ კი 8 ქულით სატურნირო ცხრილის შუაში იმყოფება.

„ვიტ ჯორჯია“ – „საბურთალო“ 0:3 (0:0)

გოლები: 0:1 კოხრეიძე (52), 0:2 შინდაგორიძე (72), 0:3 კაკუბავა (76)