ევრო 2020-ის შესარჩევ ეტაპის D ჯგუფში, სადაც საქართველოს ნაკრები გამოდის, დღეს მეორე მატჩი გაიმართა. ბაზელში, „სენტ იაკობს პარკზე“ შვეიცარიამ დანიას უმასპინძლა და ნამდვილი თრილერი შედგა.
დანიისთვის ეს პირველი მატჩი იყო მიმდინარე შესარჩევ ციკლში, ხოლო შვეიცარიას დიდებული შანსი ჰქონდა თბილისში გამარჯვების შემდეგ მორიგი სამი ქულა მოეპოვებინა. პრინციპში არც არაფერი უკლდა ამას, მაგრამ საოცრება მოხდა.
რა თქმა უნდა, დანია შვეიცარიას დიდად არ ჩამოუვარდება (თუ არ აღემატება) და დაფიქსირებულ შედეგში გასაკვირი და მითუფრო, გასაოცარი არაფერია, მაგრამ თამაშის მიმდინარეობას თუ ჩავხედავთ მართლა საოცრება უნდა დავარქვათ.
შვეიცარიის ნაკრები რემო ფროილერის გოლით დაწინაურდა და მეორე ნახევარში უპირატესობა კიდევ უფრო განიმტკიცა. ჯერ გრანიტ ჯაკამ შეაგდო, მერე ბრილ ემბოლომ და ვლადიმირ პეტკოვიჩის გუნდი 76-ე წუთისთვის სკანდინავიელებს 3:0(!) ამარცხებდა... თითქოს რა უნდა მოხმდარიყო? ალბათ, არც არაფერი.
ეს ანგარიში 84-ე წუთამდე შენარჩუნდა და დანიელთა შანსიც პრაქტიკულად ნულს გაუტოლდა. მაგრამ, არა, ვინც შვეიცარიის მარტივი გამარჯვების ირწმუნა, მწარედ შეცდა. დარჩენილ დროში მატიას იორგენსენმა, კრისტიან გიტკაიერმა და ჰენრიკ დალსგაარდმა ანგარიში გაათანაბრეს (3:3)!
ასე, ბრძოლას ყოველთვის აქვს აზრი... ამასობაში D ჯგუფში ირლანდიის ნაკრები ერთპიროვნულად გალიდერდა. მომდევნო ტურის მატჩები კი 7 ივნისს გაიმართება. საქართველო გიბრალტარს, ხოლო დანია ირლანდიას უმასპინძლებს.
შვეიცარია - დანია 3:3 (1:0)
გოლები: 1:0 ფროილერი (19), 2:0 ჯაკა (66), 3:0 ემბოლო (76), 3:1 იორგენსენი (84), 3:2 გიტკაიერი (88), 3:3 დალსგაარდი (90)
| 1. | ირლანდია | 2 | 2 | 0 | 0 | 2:0 | 6 | |
| 2. | შვეიცარია | 2 | 1 | 1 | 0 | 5:3 | 4 | |
| 3. | დანია | 1 | 0 | 1 | 0 | 3:3 | 1 | |
| 4. | გიბრალტარი | 1 | 0 | 0 | 1 | 0:1 | 0 | |
| 5. | სააქართველო | 2 | 0 | 0 | 2 | 0:3 | 0 |
