საქართველოს თავისუფალი სტილით მოჭიდავეთა ნაკრების წევრებს ევროპის 23-წლამდე ჩემპიონატის პირველი დღის შემდეგ 4 მედლის მოპოვების შანსი აქვთ.

სერბეთის ქალაქ ნოვი სადში მიმდინარე ტურნირზე ედემი ბოლქვაძე (65 კგ.) ფინალში გავიდა და ოქროს მედლისთვის იბრძოლებს, რობერტ დინგაშვილი (57 კგ.), ტარიელ გაფრინდაშვილი (79 კგ.) და გივი მაჭარაშვილი (97 კგ.) კი ბრინჯაოსთვის იჭიდავებენ.
ბოლქვაძემ ნახევარფინალში მაკედონიელი ფატი ვეისელი 10:0 დაამარცხა, გადამწყვეტ შერკინებაში კი სომეხ ვაზგენ ტევანიანს გაეჯიბრება.
დინგაშვილმა ნახევარფინალში რუს ამირხან გუვაჟოკოვთან 4:4-ზე წააგო, ბრინჯაოსთვის კი ბულგარელ და მოლდოველ მოჭიდავეებს შორის უმჯობესს შეერკინება.
გაფრინდაშვილმა ნახევარფინალი ასევე რუს რადიკ ვალიევთან 0:6 წააგო და ახლა, ებრაელ და ბელარუს ფალავნებს შორის უმჯობესს ელის.
ნახევარფინალი იბრაჰიმ ჩიფჩისთან 1:4 წააგო გივი მაჭარაშვილმა, რომელიც კვარცხლბეკზე ასასვლელად სერბ ალეკსანდარ პანტელიჩის შეერკინება.
ფინალური ბლოკი ხვალ 21:00 საათიდან დაიწყება, მანამდე კი, წინასწარი ეტაპის ორთაბრძოლებს დარჩენილი 5 წონითი კატეგორიის წარმომადგენლები ჩაატარებენ. შესაბამისად, საქმეში თეიმურაზ ვანიშვილს (61 კგ.), გიორგი სულავას (74 კგ.). ზაურ ბერაძეს (86 კგ.), დემურ მეგენეიშვილსა (92 კგ.) და ზურიკო ურთაშვილს (125 კგ.) ვიხილავთ.