მადრიდის „ატლეტიკოს“ მცველ ფილიპე ლუისს მიაჩნია, რომ 2018 წელს, „ოქროს ბურთი“ ლუკა მოდრიჩის ნაცვლად, ლიონელ მესისთვის უნდა მიეცათ.

„ამდენი წელია მესის ვუცქერ და მოხიბლული ვარ მისით. ის სულ ახალ და ახალ ამპლუებში გვევლინება. ადრე ფრთებზე თამაშობდა, ბოლო დროს ცენტრისკენ შეიწია და სასწაულებს სჩადის. ახლა კი მესმის - „ოქროს ბურთს არ იმსახურებდაო.

შარშან მან მოიგო პრიმერა, ესპანეთის თასი, ევროპის საუკეთესო ბომბარდირი გახდა, ტონა საგოლე პასები დაარიგა, მეტი რაღა ექნა? ვინც ფიქრობს, რომ მესი „ოქროს ბურთს“ არ იმსახურებდა, ვერ ხედავს იმას, რასაც მე ვხედავ. ან საერთოდ არაფერი გამეგება ფეხბურთში.

ლეო „ბარსას“ საუკეთესო ფეხბურთელია. გააქვს გოლები, არიგებს უნიკალურ პასებს, იწყებს საგოლე კომბინაციებს და ამას უკვე 10 წელიწადია აკეთებს.

ჩვენ უკვე წლებია მეტოქეები ვართ და მოწინააღმდეგეზე, ალბათ, ასეთი აღფრთოვანებით არ უნდა ვსაუბრობდე, მაგრამ, რასაც ვამბობ, გულწრფელად ვამბობ.“ - უთხრა ბრაზილიელმა მცველმა Globo Esporte-ს.