19 წლის ქართველმა კალათბურთელმა გოგა ბითაძემ ევროლიგაში მორიგი ჩინებული მატჩი ჩაატარა. ჩვენებურის “ბუდუჩნოსტმა” ფავორიტად შერაცხულ მადრიდის “რეალს” 73:60 სძლია, გოგამ კი ორმაგი დუბლი შეასრულა და გამარჯვებაში დიდი წვლილი შეიტანა.

ბითაძე მატჩში სათადარიგოთა სკამიდან ჩაერთო, თუმცა, სათამაშო დროით თანაგუნდელთაგან მხოლოდ ეარლ კლარკს ჩამორჩა. ქართველმა ცენტრმა 27:33 წუთში 13 ქულა ჩააგდო, რასაც 10 მოხსნა (4 შეტევაში), 1 ჩაჭრა და 3 დაფარება წაამატა.

ბითაძემ 6-დან 3 ორქულიანი, 5-დან 1 სამქულიანი და 4-ვე საჯარიმო ჩააგდო, ბურთი არ დაუკარგავს, 3-ჯერ დაუფარეს, ამდენივე პერსონალური ფოლი მიიღო, მის წინააღმდეგ კი თამაშის წესები 2-ჯერ დაირღვა.
შედეგად, გოგას სარგებლიანობის კოეფიციენტი 16-ს გაუტოლდა და მას მასპინძელთა მხრიდან მხოლოდ ხსენებულმა კლარკმა (25) აჯობა, რომელმაც ასევე დაბლ-დაბლი შეასრულა – 12 ქულა, 12 მოხსნა.

ერთი საინტერესო დეტალიც. “რეალის” გამოცდილმა ცენტრებმა ვალტერ ტავარესმა და გუსტავო აიონმა, რომელთა წინააღმდეგაც თამაში გოგას უწევდა, ჯამში 8 ქულა, 8 მოხსნა და 4 ბლოკ-შოტი მიითვალეს.

“ბუდუჩნოსტმა” 5 მოგება და 14 მარცხი მოაგროვა და სატურნირო ცხრილში კვლავაც მე-15 ადგილზე რჩება, თუმცა კი, მხოლოდ 1 მოგებითღა ჩამორჩება ესპანურ “გრან კანარიას”, რომელსაც 25 იანვარს უმასპინძლებს.