15 წლის ქართველი ჩოგბურთელი თამარ გაგოშიძე არაბეთის გაერთიანებული საამიროების ქალაქ ფუჯაირაში მიმდინარე იუნიორთა საერთაშორისო ტურნირის ფინალში გავიდა.

დღეს გამართულ ნახევარფინალურ შეხვედრაში გაგოშიძე პირველ ნომრად განთესილ რუს ეკატერინა ვინიკს გაეჯიბრა და 6:3, 2:6, 6:0 დაამარცხა. გადამწყვეტ მატჩში თამარის მეტოქე მე-2 რეიტინგის მქონე შვეიცარიელი ლეა მაგუნი იქნება, რომელმაც ჯერ კიდევ საწყის წრეში ნინო ნაცვლიშვილს 6:2, 6:0 სძლია.
შეგახსენებთ, რომ გაგოშიძე შეჯიბრში მე-6 განთესვით ჩაება და ნახევარფინალამდე ისე მივიდა, სეტიც კი არ დაუთმია. ჩვენებურმა კვალიფიკაციის ერთ-ერთ გამარჯვებულ – გერმანელ სოფი მუელერს 6:0, 7:5 სძლია, ჰოლანდიელ ბენტე სპეეს 7:5, 7:6 (7:5) მოუგო, მე-4 რეიტინგის მქონე ფრანგი ოსეან ბაბელი კი 6:2, 6:2 დაამარცხა.
წყვილთა ტურნირის ფინალში გაგოშიძე და ნაცვლიშვილი მე-2 განთესვის მქონე ფრანგებს (ბაბელი-ბრუნონე) გაეჯიბრნენ და დაძაბულ ბრძოლაში 2:6, 6:1, 8:10 წააგეს.