ვეტერანი იტალიელი თავდამსხმელი ჯანლუკა ვიალი ამბობს, რომ სიმსივნეს ებრძვის. მისი განცხადებით, ეს ერთი წლის წინ გაიგო, მაგრამ ამაზე საჯაროდ პირველად ისაუბრა.
„ერთი წლის წინ სიმსივნე აღმომაჩნდა, თუმცა ამის თქმა მხოლოდ ახლა გადავწყვიტე. დავიწყე წიგნის დაწერა, რომელშიც ამაზე ვსაუბრობ და იმედია, ადამიანებს ეს დაეხმარება სწორი გზის პოვნაში. ახლა ყველაფერი უკეთაა, თუმცა ბოლომდე არაფერი დასრულებულა და ბრძოლა გრძელდება.
იმედია, ჩემი ისტორია ადამიანებს დაეხმარება და ხელს შეუწყობს, რომ ცხოვრებაში იბრძოლონ“, - განუცხადა იტალიურ მედიას ვიალიმ.
შეგახსენებთ, რომ ჯანლუკა ვიალი 90-იან წლებში ერთ-ერთი წარმატებული იტალიელი ფეხბურთელი იყო. სახელი გენუის „სამპდორიაში“ თამაშით გაითქვა, რომლის რიგებში იტალიის ჩემპიონი გახდა და ჩემპიონთა თასის ფინალში ითამაშა.
1996 წელს კი, „იუვენტუსთან“ ერთად ჩემპიონთა ლიგა მოიგო და იმ სეზონში „ბებერი ქალბატონის“ კაპიტანიც გახლდათ.
