2009-2010 წლების სეზონში, გერმანიის ბუნდესლიგის მე-16 ტურში "გლადბახმა" "ჰანოვერს" უმასპინძლა და 5:3 დაამარცხა. ლამაზი, მხიარული თამაში იყო, 8 გოლი გავიდა. თუმცა, ისტორიაში მაინც სხვა კუთხით ჩაეწერა "ბორუსია პარკზე" გამართული შეხვედრა.

რატომ? - ხშირად გინახავთ ერთ თამაშში სამი ავტოგოლი? თუ არა, ამ მატჩში ნახავდით. მართლაც კურიოზული შეხვედრა გამოდგა. "ჰანოვერის" მცველების მოქმედება კი ალბათ წიგნშია შესატანი და მომავალი თაობა უნდა სწავლობდეს, როგორ არ უნდა ითამაშოს მცველმა...

"ჰანოვერის" ტუნისელმა მცველმა კარიმ ჰაგიმ დუბლი მიითვალა, მაგრამ სასიხარულო არაფერი გაუკეთებია, ორჯერვე საკუთარი კარი დალაშქრა. კონსტანტ ჯაკპაც არ ჩამორჩა და საჯარიმოს გარედან მოხდენილი გოლი შეაგდო. ბუნებრივია მანაც თავისი მეკარე დაამწუხრა. თამაში იმდენად კურიოზული იყო, რომ ჰაგი სიცილისგან თავს ვერ იკავებდა, როდესაც დაუვიწყარი "დუბლი" შეასრულა.

სხვათა შორის, "ჰანოვერმაც" გაიტანა ერთი კომიკური გოლი. 87-ე წუთზე კრისტიან შულცმა სხვაობა მინიმუმამდე შეამცირა და ანგარიში 4:3 გახადა, მაგრამ გოლს ნამდვილად ვერ გაიტანდა, "გლადბახის" მცველის კატასტროფული მოქმედება რომ არა, რომელიც ფაქტობრივად ავტოგოლს უდირდა. მოკლედ, რვიდან 4 გოლი ისეთი გავიდა, თქვენგან მოწონებული. ამაში ვიდეო მიმოხილვის ნახვის შემდეგ თავადაც დარწმუნდებით...