„მანჩესტერ იუნაიტედში“ მიმდინარე პროცესებზე კომენტარი კლუბის ლეგენდარულმა ფიგურებმა რაიან გიგზმა და როი კინმა გააკეთეს. საინტერესოა, რომ ორივე მხარი ჟოზე მოურინიოს დაუჭირა და განაცხადეს, რომ პორტუგალიელი არ უნდა გაათავისუფლონ.

„იუნაიტედისთვის“ ახლა რთული მომენტია. თუ გუნდში ცვლილებები მოხდება, დარჩება იქ, სადაც ორი წლის წინ იყო. ამიტომაც, ვფიქრობ, რომ მოურინიო მთავარი მწვრთნელის პოსტზე უნდა დარჩეს“, - განაცხადა გიგზმა.

რაც შეეხება „იუნაიტედის“ ყოფილ კაპიტანს, მისი განცხადებით, ფეხბურთელისთვის უმნიშვნელო უნდა იყოს, რა ურთიერთობა აქვს მწვრთნელთან, როდესაც მინდორზე გადის:

„როდესაც მოედანზე გადიხარ, უნდა ითამაშო საკუთარი სიამაყისთვის, ოჯახისთვის, ქალაქისთვის. არ ვისაუბრებ პოგბას შესახებ, მაგრამ ზოგადად, როდესაც ფეხბურთელს მწვრთნელი უბრაზდება, ფიქრობს - „არ ვივარჯიშებ კარგად“. არ მაინტერესებს, რა მოხდა მწვრთნელთან, ეს თამაშის ნაწილია. უნდა გახვიდე მინდორზე, სიამაყითა და ენერგიით ითამაშო“, - დასძინა კინმა.