გერმანიის ბუნდესლიგაში მიუნხენის “ბაიერნი” უდანაკარგოდ ასპარეზობას აგრძელებს. “რეკორდმაისტერის” მორიგი მსხვერპლი “ლევერკუზენი” გახდა, თუმცა, ნიკო კოვაჩის გუნდს სამი ქულისთვის გვარიანი ოფლის ღვრა მოუწია. თავიდან “ფარმაცევტები” დაწინაურდნენ, ვენდელის ზუსტი პენალტით. მაგრამ, “ბაიერნს” ზუსტად 15 წუთი დასჭირდა, რომ წინ გასულიყო. კორენტინ ტოლისომ და არიენ რობენმა ორჯერ შეარხიეს სტუმართა კარის ბადე. სხვათა შორის, კოვაჩს სანერვიულოც გაუჩნდა, რადგან იგივე ტოლისო და რაფინია დაშავდნენ და ჯერჯერობით უცნობია, რამდენად სერიოზულია მათი ტრავმების ხარისხი. მატჩს კი წერტილი ხამეს როდრიგესმა დაუსვა 89-ე წუთზე. ამრიგად, “ბაიერნი” 9 ქულით ლიდერია და ერთადერთი გუნდია, რომელსაც განვლილ სამ ტურში 100%-იანი შედეგი აქვს. აი, ამბიციური “ლევერკუზენისთვის” კი სეზონი საშინლად დაიწყო და ბოლო ადგილზე იმყოფება უქულოდ.

იგივე ითქმის ვიცე-ჩემპიონ “შალკეზე”, რომელსაც სამ ტურში ქულაც სანატრელი აქვს. “ხუმარებს” მორიგი იმედგაცრუება გლადბახში ელოდათ, სადაც ადგილობრივ “ბორუსიასთან” ვერაფერი გააწყვეს.

მიმდინარე სეზონში პირველი გამარჯვება იზეიმა “ლაიფციგმა”, რომელმაც მძიმე ბრძოლაში, მაგრამ მაინც დაამარცხა “ჰანოვერი”. რალფ რანგნიკის გუნდი აღნიშნულ გამარჯვებას დიდწილად, ტიმო ვერნერს უნდა უმადლოდნენ, რომელმაც ორჯერ დაამწუხრა სტუმრები და მასპინძლებმა 3:2 იმარჯვეს. იმარჯვა “ფორტუნამ”, რომელმაც ბუნდესლიგაში დაბრუნების შემდეგ პირველად მოიგო. დიუსელდორფელებმა “ჰოფენჰაიმი” გაუშვეს სახლში დამწუხრებული. ასევე, 2:1 მოიგო “მაინცმა”, რომელიც ჩინებულ სეზონს ატარებს და 7 ქულით ლიდერებშია.

პირველად გაუშვა გოლი და პირველი ქულები დაკარგა ბერლინის “ჰერტამ”. არადა, ძალიან ახლოს იყო დედაქალაქური გუნდი “ვოლფსბურგის” დასამარცხებლად, რადგან ჯერ 87-ე წუთამდე იგებდა, მერე, დუდას ოლით 90-ე წუთზე მეორედ დაწინაურდა, მაგრამ ანგარიში მაინც ვერ შეინარჩუნა. თავის მხრივ, “მგლებმა” გადარჩენილი ქულით წაუგებელი სერია გააგრძელეს და მათაც 7 ქულა უმაგრებთ ზურგს.

“მაინცი” – “აუგსბურგი” 2:1 (0:0)

გოლები: 0:1 დონგ ვონი (82), 1:1 უჯა (87), 2:1 მაქსიმი (90)

“ბაიერნი” – “ლევერკუზენი” 3:1 (2:1)

გოლები: 0:1 ვენდელი (5, პენ), 1:1 ტოლისო (10), 2:1 რობენი (19), 3:1 ხამესი (89)

“დიუსელდორფი” – “ჰოფენჰაიმი” 2:1 (1:0)

გოლები: 1:0 მორალესი (45), 1:1 ნელსონი (86), 2:1 ლუკებაკიო (88, პენ)

“ლაიფციგი” – “ჰანოვერი” 3:2 (2:1)

გოლები: 1:0 პოულსენი (9), 1:1 ფულკრუგი (13), 2:1 ვერნერი (40), 3:1 ვერნერი (63), 3:2 ალბორნოზი (65)

“ვოლფსბურგი” – “ჰერტა” 2:2 (0:0)

გოლები: 0:1 დილროსუნი (61), 1:1 მალი (87, პენ), 1:2 დუდა (90), 2:2 მეჰმედი (90)

“გლადბახი” – “შალკე” 2:1 (1:0)

გოლი: 1:0 გინტერი (3), 2:0 ჰერმანი (76), 2:1 ემბოლო (90)