ქართველმა მოჭადრაკე ნინო ხომერიკმა (2313) თურქულ გებზეში მიმდინარე 20-წლამდელთა მოფლიო ჩემპიონატზე პირველი მარცხი განიცადა, რაც ერთიპიროვნული ლიდერობის დათმობად დაუჯდა.
ხომერიკს ტურნირზე ზედიზედ 6 მოგება ჰქონდა, დღეს კი, შავი ფიგურებით რუს დინარა დორჯიევასთან (2318) წააგო. შედეგად, ნინომ დამატებითი მაჩვენებლებით პირველი ადგილი შეინარჩუნა, თუმცა, ახლა მის დარად 6.0 ქულა აქვთ იმავე დორჯიევასა და კიდევ ერთ რუს ალეკსანდრა მალტევსკაიას (2234).

11 ტურად მიმდინარე მსოფლიო პირველობის მე-8 ტურში ხომერიკი თეთრებით სწორედ ხსენებულ მალტევსკაიას ეთამაშება, დორჯიევა კი შავებით რუს მარგარიტა პოტაპოვას (2277) დაუპირისპირდება.
ქართველ მოჭადრაკეებს კარგი შედეგები არ აქვთ ვაჟთა ტურნირში, სადაც ნოე თუთისანსა (2471) და გიორგი სიბაშვილს (2425) აქტივში 3.5-3.5 ქულა მოუგროვდათ და შესაბამისად, 87-ე და 90-ე ადგილები უკავიათ.
ვაჟებში საუკეთესო შედეგი – 6.5 ქულა ირანელ პარჰამ მაგჰსოოდლოოს (2649) აქვს, რომელიც თანამემამულე ალირეზა ფიროუზას (2582) 0.5 ქულით უსწრებს. ასევე 6.0 ქულა მოუგროვდა ინდოელ ვენკატარამან კარტიკს (2519).