მადრიდის „რეალში“ 7-ნომრიანი მაისური თავისუფალი აღარაა. ესპანური მედიის ინფორმაციით, „სამეფო კლუბის“ ბოლო ახალწვეული, მარიანო დიასი სწორედ კრიშტიანუ რონალდუს მემკვიდრე იქნება ამ კუთხით.

ეს ინფორმაცია ოფიციალურად პარასკევს უნდა დადასტურდეს, როდესაც დიასის პრესკონფერენციაა ჩანიშნული და მედიის წინაშე პრეზენტაცია.

25 წლის ფეხბურთელმა საკმაოდ ხმამაღალი განცხადება გააკეთა ამ ნაბიჯით, ვინაიდან „რეალში“ 7 ნომერი ბევრს ნიშნავს. ის ხომ ახლო წარსულში კრიშტიანუ რონალდუსა და რაულის საკუთრება გახლდათ.

შეგახსენებთ, რომ დიასი „რეალის“ აკადემიის აღზრდილია, თუმცა გასულ ზაფხულს "ბლანკოსმა" „ლიონს“ 8 მილიონ ევროდ მიჰყიდა. ახლა კი „სანტიაგო ბერნაბეუზე“ მისი დაბრუნება 21.5 მილიონი ევრო დაუჯდა.