ესპანეთის ეროვნული ნაკრების მარჯვენა გარემარბი ალვარო ოდრიოსოლა მადრიდის "რეალში" იასპარეზებს. როგორც "სამეფო კლუბის" ოფიციალური ვებგვერდი იუწყება, მადრიდული კლუბი და "სოსიედადი" ფეხბურთელის ტრანსფერზე შეთანხმდნენ და სამედიცინო შემოწმების შემდეგ ალვარო "რეალთან" ექვსწლიან კონტრაქტს გააფორმებს.

ოდრიოსოლა სოსიედადის აკადემიის აღზრდილია და სარეზერვოდან მთავარ გუნდში 2017 წელს დააწინაურეს. გასულ სეზონში ალვარომ 41 შეხვედრა ჩაატარა, გაიტანა ერთი გოლი და ოთხი საგოლე გადაცემა შეასრულა. "ფურია როხას" რიგებში ოდრიოსოლას დებიუტი 2017 წლის 10 ივნისს ალბანეთთან შეხვედრაში ჰქონდა, სადაც საგოლე გადაცემა შეასრულა.