ყოფილი ფრანგი ფეხბურთელი ერიკ აბიდალი "ბარსელონას" პირველი გუნდის ტექნიკური მდივანი გახდება. როგორც ესპანური კლუბის ოფიციალური ვებგვერდი იუწყება, აღნიშნული პოსტი რობერტ ფერნანდესმა დატოვა და აბიდალის წარდგენა 18 ივნისს იგეგმება.

აბიდალს "ბლაუგრანას" რიგებში 2007-13 წლებში უთამაშია. ფრანგმა "ბარსელონასთან" ერთად ესპანეთის ჩემპიონატი და სუპერთასი ოთხ-ოთხჯერ მოიგო, ესპანეთის თასი, ჩემპიონთა ლიგა, უეფას სუპერთასი და ფიფას მსოფლიოს საკლუბო თასი კი - ორ-ორჯერ. ერიკმა ესპანური გუნდის მაისურით 193 მატჩი ჩაატარა.