30 ათასი ადმაიანი ორის წინააღმდეგ – გერმანიაში სკანდალია. ადგილობრივი გულშემატკივრები მესუთ იოზილისა და ილქაი გუნდოგანის გერმანიის ნაკრებიდან მოკვეთას ითხოვენ და სულ რაღაც 24 საათში 30 ათასი ხელმოწერა შეაგროვეს!

საქმე ისაა, რომ იოზილი და გუნდოგანი ლივერპულის “ევერტონის” ფორვარდ ჯენკ თოსუნთან ერთად გერმანიაში მყოფ თურქეთის პრეზიდენტ რეჯეფ თაიფ ერდოღანს შეხვდნენ. გადაიღეს სამახსოვრო სურათები და ისაუბრეს. მოგეხსენებათ, რომ იოზილსა და გუნდოგანს თურქული ფესვები აქვთ. ზემოხსენებული შეხვედრა გერმანელებისთვის მიუღებელი აღმოჩნდა. საქმე იქამდეც კი მივიდა, რომ გერმანიის კანცლერ ანგელა მერკელსაც მოუწია კომენტარის გაკეთება:

“ეპიზოდმა ხალხში გაუგებრობა გამოიწვია”, - აღნიშნა მერკელმა.

ამასობაში კი, იოაჰიმ ლიოვმა მსოფლიოს ჩემპიონატზე წამსვლელ ფეხბურთელთა სია გამოქვეყნა, თუცა 27-კაციანი. მათგან ოთხი მუნდიალზე ვერ გაემგზავრება. ფანები კატეგორიულნი არიან და სიიდან ილქაისა და მესუთის ამოკლებას ითხოვენ. თუმცა, ლიოვი ამის გაკეთებას არ აპირებს:

“არ ვფიქრობ, რომელიმე მუნდიალს მიღმა დავტოვო. იმ შემთხვევაშიც კი, თუ ხალხის რეაქცია უფრო მწვავე იქნება”, - აღნიშნა “ბუნდესნაკრების” დამრიგებელმა.

ილქაი გუნდოგანმა კი, თავის გამართლება სცადა:

“ჩვენ არ გვსურდა პოლიტიკური მესიჯების გაგზავნა, რადგან ფეხბურთელები ვართ და არა პოლიტიკოსები. უხეშები უნდა ვიყოთ ჩვენი წარმოშობის ქვეყნისა და ჩვენი მშობლების სამშობლოს პრეზიდენტის მიმართ? მესმის კრიტიკის, მაგრამ ჩვენ თავაზიანი გზა ავირჩიეთ”, - თქვა გუნდოგანმა.

აღსანიშნავია, რომ ერდოღანს შეხვედრაზე გერმანიის ნაკრების კიდევ ერთი წევრი ემრე ჯანი (ისიც თურქეთიდანაა წარმოშობით – რედ) ჰყავდა მიწვეული, მაგრამ “ლივერპულის” ნახევარმცველმა შემოთავაზება უარყო. სხვათა შორის, ლიოვის სიაში ჯანი ვერ მოხვდა.