ინგლისური “ჰალ სიტის” ნახევარმცველმა რაიან მეისონმა საფეხბურთო კარიერა 26 წლის ასაკში დაასრულა. აღნიშნულ ინფორმაციას კლუბის ოფიციალური ვებგვერდი ავრცელებს.

მიზეზი - მძიმე ტრავმაა, რომელიც მეისონმა ერთი წლის წინ, 2017 წლის 22 იანვარს მიიღო. რაიანი “ჩელსისთან” მატჩში გარი კეჰილთან შეჯახებისას მძიმედ დაშავდა (თავის ტრავმა) და მიუხედავად ბევრი მცდელობისა, ფეხბურთში დაბრუნება ვერ მოახერხა. “ჰალ სიტის” ვებგვერდის ცნობით, მეისონი 1 წლის განმავლობაში სხვადასხვა კუთხეში საუკეთესო სპეციალისტებთან მკურნალობდა, მაგრამ მედიკოსებმა ფეხბურთელს კარიერის დასრულებისკენ მოუწოდეს.

რაიან მეისონი თავის დროზე “სუინდონის”, “ლორიანის”, “მილუოლის”, “დონკასტერის”, “იოვილისა” და “ტოტენჰემის” რიგებში თამაშობდა. უთამაშია ინგლისის ყველა ასაკობრივ ნაკრებში და მათ შორის, ეროვნულ ნაკრებშიც ერთი შეხვედრა (2015 წელს იტალიასთან).