ნიკოლოზ ცქიტიშვილმა ლიბანური “ბიბლოსის” შემადგენლობაში მეორე მატჩი ჩაატარა და თავი ისახელა. სამწუხარო ისაა, რომ ქართველი ფორვარდის გარჯა მოგებით არ დაფასდა. “ბიბლოსმა” “ბეირუთს” უმასპინძლა და 81:95 წააგო.

ცქიტიშვილი სასტარტო ხუთეულში გამოჩნდა და 34 წუთში 27 ქულა, 11 მოხსნა (4 შეტევაში), 1 პასი და 1 დაფარება მიითვალა. ქართველმა ლეგიონერმა 9-დან 5 ორქულიანი, 3-დან 1 სამქულიანი და 16-დან 14 საჯარიმო ჩააგდო, ბურთი 3-ჯერ დაკარგა, ერთხელ დაუფარეს, პერსონალური ფოლი არ მიუღია, მის წინააღმდეგ კი ერთბაშად 11-ჯერ დაჯარიმდნენ. შედეგად, ნიკოლოზის სარგებლიანობის კოეფიციენტი 39-ს გაუტოლდა, რაც ორივე გუნდის რიგებში საუკეთესო მაჩვენებელი იყო.

“ბიბლოსს” 14 ტურის შემდეგ მხოლოდ 2 გამარჯვება აქვს და ბოლოსწინა მე-9 ადგილზე იმყოფება. ქართველი ფორვარდის კლუბი მომდევნო მატჩს 14 იანვარს, სტუმრად, “საგესეს” წინააღმდეგ გამართავს.

gbf.ge