მადრიდის “რეალის” თავდამსხმელი კრიშტიანუ რონალდუ მიიჩნევს, რომ ისტორიაში საუკეთესო ფეხბურთელია. ამის შესახებ კრიშტიანუმ “ოქროს ბურთის” მეხუთედ მოპოვების შემდეგ განაცხადა.

მისი თქმით, მასზე სრულყოფილი და ძლიერი ფეხბურთელი მსოფლიოს ისტორიას არ ახსოვს.

“ყველას აზრს პატივს ვცემ, მაგრამ ვერ ვხედავ ფეხბურთელს, რომელიც ჩემზე ძლიერია. სხვებს არ შეუძლიათ იმის გაკეთება, რაც მე შემიძლია – კარგია ეს თუ ცუდი.

ჩემზე მეტად სრულყოფილი ფეხბურთელი არ არსებობს და მე ფეხბურთის ისტორიაში საუკეთესო ვარ. მიზანი 7 “ოქროს ბურთის” მოგებაა. ვნახოთ, ყველაფერი შეიძლება მოხდეს. ჯერ კიდევ შემიძლია მოვიგო ტიტულები, რადგან ძალიან ძლიერი და მოტივირებული ვარ”, - განაცხადა რონალდუმ.

შეგახსენებთ, 32 წლის ფეხბურთელმა “ოქროს ბურთი” მეხუთედ მოიგო და ამ მაჩვენებელით ლიონელ მესის გაუთანაბრდა. პორტუგალიელი წლის საუკეთესო მოთამაშედ 2008, 2013, 2014, 2016 და 2017 წლებში დაასახელეს.