ხვალ საღამოს, საქართველოს 16-წლამდე კალათბურთელთა ნაკრები ევროპის ჩემპიონატის “ბ” დივიზიონის გათამაშებაში ჩაებმება. გია კაზანჯიანის გუნდი მაკედონიის ქალაქ შტრუმიცაში იმყოფება და ტურნირის პირველ მატჩში, რომელიც თბილისის დროით 23:00 საათზე დაიწყება, სლოვენიას ეთამაშება.

შეგახსენებთ, რომ 16-წლამდელთა ნაკრებმა ძალიან ნაყოფიერი მოსამზადებელი პერიოდი გაიარა. სამი კვირის განმავლობაში, გუნდმა 12 სპარინგ-მატჩი გამართა, საიდანაც 8 მოიგო, 1 ფრედ (ესტონეთის ნაკრებთან) დაასრულა და 3 (ბელგიასთან ორჯერ და უკრაინასთან) წააგო. ქართველებმა ყველაზე დასამახსოვრებელი გამარჯვება ლატვიურ შეკრებაზე მოიპოვეს, როდესაც რუს თანატოლებს 72:55 სძლიეს.

“ბ” დივიზიონში სულ 22 ნაკრებია, რომლებიც ორ ექვსგუნდიან და ამდენივე ხუთგუნდიან ჯგუფში არიან განაწილებულნი. ქართველი 16-წლამდელები წილისყრამ აშკარად არ დაინდო და “ბ” ჯგუფში თამაში ისრაელთან, სლოვენიასთან, მაკედონიასთან და ნორვეგიასთან მოუწევთ. დაგვეთანხმებით, ქვედა დივიზიონისთვის საკმაოდ ძლიერი შემადგენლობაა.

ჯგუფიდან გასვლისთვის საუკეთესო ორ გუნდში მოხვედრაა საჭირო. ამგვარად გამოვლენილი 8 ნაკრები მე-2 ჯგუფურ ეტაპზე ითამაშებს, იქ შექმნილი ოთხგუნდიან ჯგუფებიდან მოწინავე ორეულები ნახევარფინალში გავლენ, “ა” დივიზიონის საგზურებს კი 3 საუკეთესო ნაკრები მიიღებს.

განრიგის თანახმად, საქართველოს ნაკრების პირველი მეტოქე სლოვენია იქნება, 21-ში ისრაელთან მატჩია, 22-ში ქართველებს დასვენების დღე ექნებათ, 23 აგვისტოს ნორვეგიას ვეთამაშებით, 24-ში კი – მაკედონიას.

ევროპის ჩემპიონატი 16-წლამდე კალათბურთელთა შორის. “ბ” დივიზიონი. სტრუმიცე (მაკედონია)

A ჯგუფი: ინგლისი, ლუქსემბურგი, ბელგია, ესტონეთი, რუმინეთი, შოტლანდია.

B ჯგუფი: ისრაელი, ნორვეგია, სლოვენია, საქართველო, მაკედონია.

C ჯგუფი: უნგრეთი, ისლანდია, ჩეხეთი, ბულგარეთი, ჰოლანდია.

D ჯგუფი: შვედეთი, ავსტრია, ჩერნოგორია, შვეიცარია, პორტუგალია, ალბანეთი.

B ჯგუფის კალენდარი (დრო თბილისისაა)

20 აგვისტო

20:45 ნორვეგია – მაკედონია

23:00 საქართველო – სლოვენია

21 აგვისტო

16:15 ისრაელი – საქართველო

18:30 სლოვენია – ნორვეგია

22 აგვისტო

20:45 მაკედონია – სლოვენია

23:00 ნორვეგია – ისრაელი

23 აგვისტო

18:30 საქართველო – ნორვეგია

20:45 ისრაელი – მაკედონია

24 აგვისტო

14:00 სლოვენია – ისრაელი

20:45 მაკედონია – საქართველო