C ჯგუფის მეორე ტურში სამი შეხვედრა გაიმართა. ევრობასკეტის უმთავრესი ფავორიტი ესპანეთის ნაკრები ჩეხეთს დაუპირისპირდა და შავი დღე აყარა.

ესპანელებმა პირველ ტურში მონტენეგრო 39-ქულიანი სხვაობით გაანადგურეს, ხოლო ჩეხებს 37-ქულიანი სხვაობით გაუსწორდნენ. “ლა როხამ” შეხვედრის ბედი პირველივე ტაიმში გადაწყვიტა და შესვენებაზე 33-ქულიანი უპირატესობით გავიდნენ - 23:56. მეორე ნახევარში ესპანელებმა ძალები დაზოგეს და ანგარიში მხოლოდ 4 ქულით გაზარდეს – 56:93.

საუკეთესო იყო პაუ გასოლი, რომელმაც 26 ქულა, 8 მოხსნა და 2 გადაცემა მიითვალა. მისმა ძმამ მარკმა 8 ქულა, 9 მოხსნა და 4 გადაცემა დააგროვა. რაც შეეხება ძმებ ერნანგომესებს, ვილის 9 ქულა და 10 მოხსნა ჰქონდა, ხოლო ხუანს 7 ქულა, 8 მოხსნა და 2 გადაცემა. საკუთარ გუნდს 17 ქულით, 2 მოხსნით და 5 გადაცემით შეეწია რიკი რუბიო.

ჩეხეთიდან ყველაზე შედეგიანი მოთამაშე მარტინ კრიზი იყო, რომელმაც 11 ქულა, 4 მოხსნას და 1 გადაცემას მოუყარა თავი. 8 ქულა, 5 მოხსნა და 5 გადაცემა ჰქონდა ტომაშ სატორანსკის.

მეორე თამაში მოიგო ხორვატიის ნაკრებმაც, რომელმაც რუმინეთი 74:58 დაამარცხა, ხოლო მონტენეგრომ ესპანეთის ჯავრი უნგრეთზე იყარა და 72:48 გაანადგურა.

ჩეხეთი – ესპანეთი 56:93 (14:33; 9:23; 15:20; 18:17)

ხორვატია – რუმინეთი 74:58 (20:12; 22:17; 15:13; 17:16)

მონტენეგრო – უნგრეთი 72:48 (14:11; 25:18; 21:11; 12:8)