ჭადრაკის მსოფლიო თასის გათამაშების შესახებ გამართულ პრესკონფერენციაზე კომენტარი გააკეთა საქართველოს ჭადრაკის ფედერაციის პრეზიდენტმა გია გიორგაძემ, რომელმაც ის ოთხი მოჭადრაკე წარადგინა, საქართველოს სახელით რომ იასპარეზებენ.

"საქართველო არის საჭადრაკო ქვეყანა და ეს ჩვენ ქართველებმა ყველამ ძალიან კარგად ვიცით. წლეულს გაიმართება მსოფლიო თასი, მომავალ წელს გაიმართება მსოფლიოს საჭადრაკო ოლიმპიადა. მინდა ფედერაციის სახელით ვთქვა, რომ ყველა სადაო საკითხი მოგვარებულია და მზად ვართ, რომ ვუმასპინძლოთ ამ ღონისძიებას მაღალ დონეზე.

რაც შეეხება ჩვენს მოჭადრაკეებს, ესენი არიან: მამაკაცთა ჭადრაკის უპირობო ვარსკვლავი ბაადურ ჯობავა, რომელიც ძალიან ხშირად გვახარებს თავისი მაღალი შედეგებით; ასევე ლევან ფანცულაია და მიხეილ მჭედლიშვილი - მათაც არაერთხელ უბრძოლიათ საქართველოს სახელით; და ევროპის ჩემპიონი ნანა ძაგნიძე, რომელმაც ისტორიულ შედეგს მიაღწია წლეულს - მას მსოფლიოს მოქმედ ჩემპიონს დავუპირისპირებთ. იმედი მაქვს, მათი ყურება ყველასათვის სასიამოვნო იქნება" - განაცხადა გიორგაძემ.

ჭადრაკის მსოფლიო თასის გათამაშება თბილისში 2 სექტემბერს დაიწყება, ფინალური მატჩი კი 28 სექტემბერს გაიმართება.