გიორგი ჭანტურია რვათვიანი უქმობის შემდეგ მოედანს გოლით დაუბრუნდა. საქართველოს ნაკრების შემტევმა რუსეთის პრემიერლიგის მეორე ტურის მატჩის, “დინამო” – “ურალის” ბედი გადაწყვიტა და საკუთარ გუნდს 1:0 მოაგებინა.

შეხვედრის შემდეგ ქართველმა ფეხბურთელმა ადგილობრივ მედიასთან ისაუბრა.

- გაიხსენებთ გოლის ეპიზოდს?

- კუთხურის გავითამაშეთ და გადავწყვიტე კარისკენ ნახევრად დამერტყა. ვფიქრობდი, ბურთი თუ ვინმეს შეეხებოდა გოლი გავიდოდა, მაგრამ აღმოჩნდა, რომ არავის შეხებია და გოლი მე გავიტანე. რაც ყველაზე მთავარია გუნდმა მნიშვნელოვანი სამი ქულა მოიპოვა და ძალიან ბედნიერები ვართ.

- ელოდით ამ შეხვედრაში გამარჯვებას?

- რა თქმა უნდა. ჩვენ ძალიან კარგი გუნდი გვყავს და ყველა მატჩში გამარჯვებაა მიზანი.

- რა გითხრათ მთავარმა მწვრთნელმა ალექსანდრ ტარხანოვმა?

- მომილოცა და თბილი სიტყვები მითხრა. ბოლოს რვა თვის წინ ვითამაშე და მოედანს ეს-ესაა დავუბრუნდი.

- თქვენ კმაყოფილი ხართ საკუთარი თამაშით?

- რა თქმა უნდა. ძალიან ბედნიერი ვარ. რვა თვიანი უქმობის შემდეგ თამაში დავიწყე. მართალია მხოლოდ 15 წუთი ვითამაშე, მაგრამ გატანაც მოვახერხე.

- როგორ ფორმაში ხართ?

- ყოველდღე ვვარჯიშობ. ვცდილობ, რაც შეიძლება მალე ვიყო მზად 90 წუთის სათამაშოდ. ახლა კარგ მდგომარეობაში ვარ.