საქართველოს 19 წლამდე ნაკრების მეკარე გიორგი ჩოჩიშვილმა, ჩეხეთის ამავე ასაკობრივ ნაკრებთან 2:0 მარცხის შემდგომ, ჟურნალისტებთან საუბრისას ტურნირი შეაფასა და გულშემატკივარს ბოლომდე ერთგულებისათვის მადლობა გადაუხადა. როგორც ახალგაზრდა მეკარემ გვითხრა საქართველოში ფეხბურთი არსებობს.

„ძალიან კარგი ტურნირი იყო, ორგანიზებაც უმაღლეს დონეზე. ვფიქრობ გუნდმა კარგად ითამაშა და მაყურებელს დასამახსოვრებელი მომენტები ვაჩუქეთ. ძალიან კმაყოფილი ვართ ჩვენი თავით და ყოველთვის ვეცდებით ჩვენი ქვეყანა გავაერთიანოთ კარგი თამაშით. იმედია მომავალშიც ასე მოვიზიდავთ გულშემატკივარს. გვქონდა კონცენტრაციის ნაკლებობა. იღბალმა გვიმტყუნა და სამწუხაროდ დავმარცხდით, თუმცა მე ვფიქრობ, რომ ჩვენი წარმატება ის იყო, რომ გულშემატკივარს გავუღვიძეთ იმედი. საქართველოში ფეხბურთი არსებობს. დრო და დრო გაიზრდებიან ის ბიჭები, რომლებიც ასე გააერთიანებს ქვეყანას".

„პირადად მე ფეხხურთი ძალიან მიყვარდა და ყოველთვის მინდოდა რამეს მიმეღწია. მოგეხსენებათ ბაბუაჩემი ოლიმპიური ჩემპიონი იყო და წესით ჭიდაობაში უნდა გამემართლებინა იმედები, მაგრამ დარწმუნებული ვარ, რომ ცოცხალი ყოფილიყო ჩემით იამაყებდა. ვფიქობ, რომ მცირე წარმატებას უკვე მივაღწიე და ვეცდები წინ და წინ წავიწიო. ცოტა ხანი ჭიდაობაში ვვარჯიშობდი, მაგრამ ფეხბურთისკენ უფრო მიმიწევდა გული. ძალიან დიდი მადლობა კიდევ ერთხელ თქვენ, გულშემატკივრებო, რომ ასე ერთგულად დაგვიდექით გვერდში. ჩვენ ჩვენი მხრიდან ყველაფერს გავაკეთებთ, რომ გაგახაროთ. რაც შეეხება ჩემს მომავალ კარიერას, დაინტერესებები ჩემდამი არის, თუმცა სერიოზული შემოთავაზებები ჯერ არ ყოფილა და ყველაფერს მომავალი გვიჩვენებს", - განაცხადა გიორგიმ.

შეგახსენებთ, რომ საქართველოს 19 წლამდე ნაკრები ევროპის ჩემპიონატს გამოეთიშა.