ბრაზილია პირველია, რომელმაც მუნდიალ-2018-ის საგზური გაინაღდა. კიდევ რამდენიმე ნაკრები ახლოსაა, მაგრამ ოფიციალურად ჯერ არავინ გასულა. ბრაზილია ბრწყინვალეა ტიტეს თავკაცობით, მოგება მოგებად და ის ძველი სათამაშო ელვარებაც დაიბრუნეს, დუნგას დროს მიძინებული რომ იყო.
"სელესაომ" 3:0 მოუგო პარაგვაის. სამივე გოლი ლამაზი იყო: კოუტინიუმ შორიდან ცაციით, ნეიმარმა ინდივიდუალური გარღვევის შემდეგ და მარსელომ პაულინიოს ქუსლური პასის მერე.
აი, არგენტინას კი უჭირს. მაღალმთიან ბოლივიაში თამაში რთულია, თუმცა იქაც მოუგიათ სხვა ნაკრებებს. "ალბისელესტეს" ადრე 1:6 აქვს ბოლივიაში წაგებული, ამჯერად კი 0:2 დამარცხდა. რთულია ლეო მესის გარეშე, რომელმაც კიდევ სამი ოფიციალური მატჩი უნდა გამოტოვოს დისკვალიფიკაციის გამო.
ცეცხლს ეთამაშება ურუგვაიც, რომელიც კარგა ხანს ლიდერობდა შესარჩევის ცხრილს. "სელესტემ" ზედიზედ მესამედ წააგო, ამჯერად 1:2 პერუში. სუარესმა და კავანიმ ვერა, მაგრამ "მონტერეის" 33 წლის ნახევარმცველმა კარლოს სანჩესმა გაიტანა. პერუს ჯერ კიდევ აქვს მცირე შანსი, რომ მუნდიალზე მოხვდეს.
ჩილე 22-ე წუთზე უკვე სამი ბურთით უგებდა ვენესუელას. ბრწყინვალე გოლი გაიტანა ალექსის სანჩესმა - საჯარიმო დარტყმით. დუბლი კი 36 წლის ესტებან პარედესმა მიითვალა.
კოლუმბიამ სტუმრად 2:0 მოუგო ეკვადორს, რომელიც ბოლო მატჩებში აშკარად დასუსტდა. ხამეს როდრიგესმა და ხუან კუადრადომ გაიტანეს დაცვის შეცდომის შედეგად.
სულ 4 ტური დარჩა, მეორეადგილოსანსა და მეექვსეადგილოსანს შორის მხოლოდ 4 ქულაა სხვაობა, ასე რომ, დაძაბული თამაშები გველის. როგორც იცით, ოთხი გუნდი პირდაპირ გადის, მეხუთე კი ოკეანეთის ზონის გამარჯვებულს შეხვდება პლეი-ოფში.
ბრაზილია - პარაგვაი 3:0 (1:0) VIDEO
გოლები: 1:0 კოუტინიო (33), 2:0 ნეიმარი (64), 3:0 მარსელო (86)
64-ე წუთზე ნეიმარმა ვერ გაიტანა პენალტი
ბოლივია-არგენტინა 2:0 (1:0) VIDEO
გოლები: 1:0 არსე (31), 2:0 მორენო (32)
ჩილე-ვენესუელა 3:1 (3:0) VIDEO
გოლები: 1:0 სანჩესი (5), 2:0, 3:0 პარედესი (7, 22), 3:1 რონდონი (64)
77-ე წუთზე სანჩესმა ვერ გაიტანა პენალტი
პერუ-ურუგვაი 2:1 (1:1) VIDEO
გოლები: 0:1 კარლოს სანჩესი (30), 1:1 გერერო (34), 2:1 ფლორესი (62)
გაძევება: ურეტია (76, ურუგვაი)
ეკვადორი-კოლუმბია 0:2 (0:2) VIDEO
გოლები: 0:1 ხამეს როდრიგესი (20), 0:2 კუადრადო (33)
გაძევება: ლუის კაისედო (61, ეკვადორი)
| 1. | ბრაზილია | 14 | 10 | 3 | 1 | 35:10 | 33 | |
| 2. | კოლუმბია | 14 | 7 | 3 | 4 | 18:15 | 24 | |
| 3. | ურუგვაი | 14 | 7 | 2 | 5 | 26:17 | 23 | |
| 4. | ჩილე | 14 | 7 | 2 | 5 | 24:19 | 23 | |
| 5. | არგენტინა | 14 | 6 | 4 | 4 | 15:14 | 22 | |
| 6. | ეკვადორი | 14 | 6 | 2 | 6 | 23:20 | 20 | |
| 7. | პერუ | 14 | 5 | 3 | 6 | 22:23 | 18 | |
| 8. | პარაგვაი | 14 | 5 | 3 | 6 | 13:21 | 18 | |
| 9. | ბოლივია | 14 | 3 | 1 | 10 | 12:32 | 10 | |
| 10. | ვენესუელა | 14 | 1 | 3 | 10 | 17:34 | 6 |
მომდევნო ტური
31 აგვისტო
ჩილე - პარაგვაი
ბრაზილია - ეკვადორი
ვენესუელა - კოლუმბია
პერუ - ბოლივია
ურუგვაი - არგენტინა
